Aizawl May 5, 2023 : Congress party chuan Pathian leh mipui zarah kum 2023 MLA inthlanpuia chakna kan chan chuan Mizoram sawrkar hnathawk, New Pension Scheme (NPS) hmangtu te tan Old Pension Scheme kan pe vek ang, an ti. Thil tih theih ngei nia an hriat avangin tuna Mizoram sawrkarin sum leh paia harsatna a tawh mek chhawk zangkhai nan pawh Old Pension Scheme hi kalpui ngei tul an tih thu an sawi.

Assembly Budget Session zawhna leh chhanna atanga a lan danin January 24, 2023 thleng khan New Pension Scheme hnuaiah sawrkar hnathawk mi 9276 an awm a. NPS hmangtute pawisa thawh do let nana sawrkarin a senso zat chu hetiang hi a ni:

Sawrkar Kum    Sawrkar Sum Sen Zat (in rupees)
2020-2021         43,68,08,761
2021-2022         44,39,08,800
2022-2023         41,23,48,271 (Dec. 2022 thleng)
Source: Assembly Zawhna leh Chhanna (Lalduhoma MLA) 9.2.2023 Unstarred.

Table a kan hmuh ang hian New Pension Scheme-a sawrkarin sum a senso zat hi tunah chuan kum khatah cheng vaibelchhe 45 vel a ni dawn a. Sawrkar hnathawk lak belh apiangin kumtin a pung zel dawn a, Mizoram ang State rethei zawk tan chuan zawh loh hun a awm thei nia an hriat thu an sawi bawk.

MPCC chuan, "Sawrkar Treasury-ah bill tang a tam hle a, Pension a chhuakten sum chhuahpui tur an nei lawk ngai tawh lo. Hetianga sum leh paia harsatna lian tham a awm mek laia NPS tana kum tin cheng vbch 40 chuang sen a ngai ziah hi sawrkar tan pawh phurrit tak a tling a ni. Hemi chhawk zangkhaina tha tak chu Old Pension Scheme a let leh hi a ni a. Mizoram tan chuan NPS aiin OPS hi a zangkhai rih zawk a ni," an ti.

New Pension Scheme hi Mizoram sawrkarin kum 2010 September thla atangin a hmang chauh va, chuvangin NPS hnuaiah pension a chhuak an la awm tam lova, sawrkar tan zangkhaina tur a awm lo. NPS tih tawp a nih hian Old Pension Scheme a senso a pun phah vakna tur tunah chuan a awm chuang lo bawk a ni. 

Central-ah pawh NPS hi hman a nih leh a rinawm thu sawiin Congress chuan, "National Pension Scheme hi Sawrkar Laipui hnuaia thawk tam takin an duh lova. Chuvangin, Sawrkar Laipui pawhin National Pension Scheme (NPS) a kalpui mek hi a khua leh tuite that tlanna ber tura ennawn turin Finance Secretary, Govt of India kaihhruaina hnuaiah Committee pawh April 6, 2023 khan a din a ni. Sawrkar Laipui hnuaiah pawh hian Old Pension Scheme-ah kan let leh vek lovang tih a sawi thei loh," an ti.

Congress Party chuan Old Pension Scheme a let leh nise ti a an aupui chu vote zawnna ngawr ngawr ni lovin ram sum leh pai dinhmun chhe zual zel tur venna tur a ni, an ti. Tuna Mizoram dinhmunah chuan Old Pension Scheme leh New Pension Scheme pek kawp hi a zo lo a, sum leh pai dinhmunin hma a sawn lehzual deuh huna kalpui chauh chi-ah an ngai thu an sawi.