Aizawl: Congress party chuan MNF party chu SEDP cheng nuai 3 sem tumna nei tak tak loah an puh.

Nimin khan Aizawl Press Club-ah chanchinbumite kawmin MPCC Media department hotute chuan August 27, 2020-a Village Council leh Local Council thlanna lo awm turah MNF hruai- tute chuan SEDP hnuaia cheng nuai 3 sem chungchang an sawi uar thar leh niin an sawi a.

MPCC Media Secretary C.Lalhriatpuia chuan, “MNF sawrkar hnu, kum 2 chhung hian SEDP atan cheng vbc. 1263 zet an dah tawh a. Heta tang hian an tiam angin cheng nuai 3 hi sem ni se, chhungkaw 42,100 zetin SEDP nuai 3 hi an dawng tawh dawn tihna a ni a. Amaherawhchu, tun thlengin Mizoramah SEDP cheng nuai 3 dawng sawi tur reng reng an la awm lo a, hei hian SEDP-ah mipui tan beisei tur a awm lo tih a tichiang hle a ni,” a ti.

MPCC chuan 2018 MLA election dawnah MNF President Zoramthanga chuan SEDP cheng nuai 3 sem tur thu a sawi a, sawrkarna an siam hnuah erawh a thusawi dan thlakin an sem dawn loh thu a sawi leh niin an sawi a. “Chhungkaw tam takin SEDP cheng nuai 3 dawn an lo inbeiseina chu a thamral mek a, inthlan dawna mipui bum nana MNF auhla mai a ni tih a chiang chho zel a ni,” a ti bawk.