Aizawl February 7, 2023 : February 20, 2023 (Thawhlehni) a Mizoram Pradesh Congress Committee inthlan tur atana President chuh tur Zodintluanga chuan an party inthlanah official candidate siam a nih ngai loh thu a sawi a, Executive Committee in candidate erawh an ruat thin thu a sawi a, a hranpa in official candidate an awm ngai lo, a ti.

Vawiin khan President, Vice President leh Treasurer chuh turin Zodintluanga Ralte, Ngunlianchunga leh Lalrindika Ralte te chuan nomination an file a, a hma in heng Office Bearer seat chuah tur hian Lal Thanzara, Lalnunmawia Chuaungo leh Lalmalsawma Nghaka ten nomination an lo file tawh a ni.

President chuh tur Zodintluanga Ralte, Ex MLA chuan Chief Minister hlui leh an party president hlui Lal Thanhawla hnen atangin recommendation a lak thlap thu a sawi a, chutihrualin an party inthlanah official candidate siam a nih ngai loh thu a sawi. Line-up insiam vek hnua official candidate-a inphuahchawp chu thil tih ngaih a nih loh thu a sawi bawk.

A ze ding zawk leh zawk loh chungchangah Congress MLA ni vek tawh an nih thu leh Congree MLA term thum lo ni tawh te term thum tling tawh te an nih thu a sawi a, Congress party tana Assembly House-ah pawh theihtawp lo chhuah ho thin an nih thu a sawi bawk.

Party inthlanna atan inremsiam tumna a awm leh awm loh chungchanga zawhna a chhannaah Ngunlianchunga, MLA chuan theihtawp a chhuah thu leh insiamrem tha a tih thu committee naah pawh a sawi a, MLA awmchhun in a ngenna chuan awmzia a neih lo a ti.