Aizawl August 17, 2022 : MPCC Treasurer Zodintluanga, MLA chuan MNF sawrkar-in kan ram a tihchhiat mek siam tha turin Congress party bak kan awm lo a, ZPM chu an than a tawp tawh, a fan theih tawp in an fan tawh. Congress kan sawrkar leh ngei a tul a ni, a ti. 

Vawiina Congress Thalai (MPYCC) in an din thar, MPYCC Social Media Department puala 'Meeting Cum Short Training' an buatsaih-a hun hmanpuitu Zodintluanga chuan, "Hmasawnna ruhrel liantham leh rotling tam tak te kha MNF sawrkar hmasa khan tichhe vekin an kalsan a, Kum 10 chhung Congress sawrkar leh khan sum dinhmun tha takah kan dah a. Tunah MNF sawrkar kum li chhung hian nawmchenna leh leiba bakah sum harsatna khurpui-ah min hruai lut leh ta. Hemi siamtha leh tur hian Congress kan sawrkar leh ngei a tul a ni," a ti. 

Zodintluanga chuan, MNF in an sorkar theih na tura an hmatheh SEDP avanga beidawng mipui zawng zawng ten congress party an rawn zawm vek dawn, party hming thlak thut vanga sawrkar theih ni se chuan MNF(N) leh ZNP te kha an sawrkar daih tawh ang a ti. ZPM tia an invuah leh tak avang hian an sawrkar dawn loh thu sawiin, "ZPM chu an than a tawp tawh, a fan theih tawp in an fan tawh a, 2023-ah hian Mizoram dinhmun chhe mek tung ding leh tur hian, sum enkawl thiam leh eirukna a fihlim Pu Lalsawta kaihhruai Congress party lo chu sawrkar tur a awm lo a ni," a ti.  Tuna Mizorama party hrang hrang president te en vang vang hian Lalsawta tluk a mipui rinkai leh ram siamna tha tura experience nei tha an awm lo, a ti bawk.

MPYCC President Dr. Lalmalsawma pawhin fuihna thu sawiin, "Congress Party mipui zawng zawngin kan Party President Pu Lalsawta principle hi kan tawmpui a, Mizoram mipuite tan sawrkar tha siam kan tumnaah a tha tih chak hi kan mawhphurhna a ni," a ti.