ZALEN June 9, 2025 : ZPM General Heaquarters chuan Vawiin khan an Party Pisa ah chhung inkhawm an hmang a, he huna thusawitu Supply Minister B. Lalchhanzova chuan, Mizoramin kalphung hlui sawrkar ang kha kan neih leh a hlauhawm tiin, Congress leh MNF te hi an thawkho zel dawn em? tih chu zawhna lian tak a nih thu a sawi.

Aizawl East-II Bialtu MLA B.Lalchhanzova chuan, “Kum 37 zet kan ram lo hruaitu Congress leh MNF Party-te kha ZPM Party lo pian hma zawng kha chuan Ui leh Kel thlun pawlh ang maiin an in hal thin hle a, chu chuan politics tuinu hringchhuakin mipuite min ti chiai thin a, kalphunghlui sawrkar ang kha neih leh hi a hlauhawm hle a ni."

"ZPM Party lo pian hnu khan nasa taka inbei thin party pahnih te inbakkaihna thawm a reh chho tan ta a, eptu party-a an han awm dun meuh chuan an dinhmun an hrechiang ta a niang, inbauh chu sawi loh, Party khata inchhun fin an tum emaw tih tur khawpin kan hmalawka AMC inthlan lo awm turah pawh seat insema thawkho turin an in be mek tih thawmte a awm ta zel a, tu zawkin nge Seat chang hnem zawk ang le?. Tin, MLA inthlan thlengin lo thawkho zel pawh nise tu party zawkin nge CM Candidate chang ang tihte hi an buaina lian tak tur a ni. Chuvangin Congress leh MNF Party te hi an thawkho zel dawn em? tih hi zawhna lian tak a tling a ni,” a ti.