Aizawl August 12, 2022 : Vawiin khan Golden Hall, Congress Bhawan-ah MPCC Zirtawpni Political Session neih a ni a, he hunah hian MPCC President chuan Congress a sawrkar loh chuan ram a ngaihtuahawm thin, tiin Congress party-a haw khawm turin an mi leh sa hlui te a sawm a, Dr. Lallianchhunga chuan Mizoram politics chungchang a sawi bawk.

He huna thusawitu MPCC President Lalsawta chuan, "Congress party kan sawrkar loh chuan ram hi a ngaihtuahawm thin a. Kum 2023-a kan sawrkar loh phei chuan kan ram chhiat dan tur hi a nasa dawn a. Chuvangin, a chhelai siam thatu ni turin, Congress party a lo awm tawh zawng zawng, engemaw vanga kan party atanga chawl tawh te pawh, Congress party a lo haw khawm leh vek turin thinlung leh tihtakzetin ka sawm che u a ni," a ti. 

MPCC Spokesperson Dr. Lallianchhunga pawhin thu sawiin, "Mizorama Congress party chak leh chak loh hi Delhi a kan dinhmunin a hril lo’ tih sawiin, Dr. Lallianchhunga chuan, "Mizoram Congress party innghahna chu Lal Isua a ni a. Pathian duhdana insiam tha a, candidate leh policy tha kan neih apiangin mipuiin min thlang tling thin. Election Manifesto pawh Mizoram mil tur Congress party in a siam a, chumi hmang chuan Zoram mipuite hnenah kan inpho chhuak a. Central-ah Congress party in sorkarna a siam leh siam loh hi Mizoram a Congress party innghahna a ni lo," a ti. "Delhi a Congress party dinhmun nena Mizorama kan dinhmun sawi zawm thintute hi Central Hindu BJP-a innghat party an ni. Mizoram BJP President in MNF te hi BJP hnen atanga inthlanna campaign senso, sum leh pai dawng angin a lo puh tawh. Nov.30,2020 khan Mizoram chhung ngei-ah, Press mite hmaah Nagaland BJP hruaitu leh Mizoram viltu, M.Kikon ngei pawhin ‘MNF te hi BJP vanga sorkar thei chauh an ni’ tih a sawi pawh tun thlengin MNF hotute’n an chhang ngam lo,’ a ti bawk.

Dr. Lallianchhunga chuan, "Mizoramah hian tualto (regional) party tam tak a ral tawh. National party lian tak, Congress party kan awm chhung chuan Tualto party (regional party) lian tak 2 a awm thei lo, MNF leh ZPM te hi an indip ral thuai dawn. ‘Min enchhin rawh u’ titute hi mipuiin kan enchhin tawh hnu te, kan duh loh a kan paih leh tawh hnu te an ni a. An zinga thenkhat chu vawi engemawzat inthlanna lo chuh ve tawh, mipuiin enchhin tlaka kan ngaih loh te tho kha an ni," a ti.

MPCC Spokesperson chuan, "Congress party chu harsatna nasa tak paltlang tawh a nih avangin a chhel a, tha hrui a nei bawk.  Eptu party dinhmun atanga Mizoram dinhmun hmufiah lehzual tura Pathianin min buatsaih chang te pawh a nei a. Chumi dinhmun atang chuan, Pathian hriatpuia theihtawp chhuahin, Mizoram mipuite tana sorkar tha leh rintlak siam turin kan inbuatsaih mek a ni," tih a sawi. 

He hun hi Lt.Col.ZS Zuala, Ex-MLA kaihhruainain neih a ni a; India Independence Day vawi 75-na puala hman niin, Resource Person Sangzuala Hmar, Chairman Social Media Deptt chuan ‘BJP Thupui: Zalenna Zin Kawng Tihdanglam’ tih thupui hmangin Power Point Presentation a nei bawk a ni.