ZALEN August 11, 2023 : Vawiin khan Mizoram Congress Bhawan, Golden Hall-a Friday Political Session a hun hmangtu MPCC President Lalsawta chuan Mizoram MP pahnih ten Voice Vote an pe chu lawmawm a tih thu a sawi a, Mizoram mipui hriatah MNF Party-in NDA sorkar a thlawp loh thu puangzar turin a ngenna bawk.

Lalsawta chuan, “Mizoram MP pahnih Pu K. Vanlalvena leh Pu C. Lalrosanga te’n Parliament-a BJP kaihhruai NDA sorkar rin tawk lohna (No Confidence Motion) ah “NDA sorkar hi kan ring tawk lo e,” tiin a thlawp zawngin Voice Vote an pe hi lawmawm. Hei hi MNF Headquarters emaw, Chief Ministers’ Office atangin emaw, Mizoram mipui hriatah MNF Party-in NDA sorkar a thlawp loh thu hi puangzar ngei rawh se tih hi ka ngenna a ni," a ti. "Inthlan a hnai a, BJP zawm lo anga Mizo mipui min bum leh mai mai dawn a nih chuan kan tuar nasa tawh, bum tlak kan ni tawh lo, 1966 a kan tawrhna kha a tawk viau tawh a ni" tiin MPCC President chuan a sawi.

Thusawitu dang MPCC Treasurer Dr. Lalmalsawma Nghaka   chuan, "Mizoram MP pahnih Pu K. Vanlalvena leh Pu C. Lalrosanga te’n Parliament-a BJP kaihhruai NDA sorkar rin tawk lohna (No Confidence Motion) ah “NDA sorkar hi kan ring tawk lo e,” tiin a thlawp zawngin Voice Vote an pe hi a lawmawm. “Hetianga MNF in BJP kaihhruai sorkar an rin tawk tawh loh takzet chuan NDA leh NEDA atanga inla hrang a, Sakhaw Zalenna Duhtu pawl Pu Lalsawta kaihhruai Congress party hmalakna a din Mizoram Secular Alliance a lo tel ve turin MNF te hi kan sawm a ni. Heti khawpa kan hnam leh kan sakhuain a tawrh laia ZPM leader in BJP an thawhpui dawn leh dawn loh a la sawi thei lo hi a pawi ka ti a, Kan hnam leh sakhaw himna a ngaih pawimawh lohzia a chiang a ni,” a ti.