ZALEN June 30, 2025 : Congress party chuan Remna Ni vawi 39-na lawmna vawiin khan Golden Hall, Congress Bhavan-ah an hmang a, he huna thu sawitu MPCC President Lal Thanzara chuan remna leh muanna thlen dan thangtharte hnenah sawi thar a ngai a ti a, MNF hruaitu thenkhat sawi dan tha a tih loh thu a sawi.

Lal Thanzara chuan, "Kan ramah kum 1966-ah buaina a chhuak a, ram buai kan lo ni ta a. Tunah hian thangthar tam tak ram buai hre pha lo an awm a, keini hian thangthar te hnenah kan sawi thar leh a ngai a ni, chuti lo chu politics-ah kalsual theihna a awm dawnin ka hria."

"Remna leh muanna nei tur chuan a man pek a ngai a. Khatih laia Chief Minister leh Minister te khan an nihna remna leh muanna a awm theih nan an kalsan a ni. 

Hun a lo kal zel a, Mizoram Congress remna leh muanna thlentu pawh Pathianin mal a sawm a, Mizoram-a hmasawnna zawng zawng deuhthaw hi kan kutchhuak a ni a, kan intiamna te pawh kan ti hlawhtling zel a ni. He inremna pawh hian a daihrei a, MNF hruaitu thenkhat ten thangthar zawk te fuihpawrhin remna leh muanna tichhe zawngin thu sawi thin mah se, Pu Laldenga khan he inremna hi a sign tawh a, India Constitution hnuaiah intulut tawh a ni tih hria se ka duh a ni," a ti. 

MPCC President chuan, "Kum 1967 ah Congress a lo piang a, an tum ber chu remna leh muanna thlentir a ni. Khatih laia Congress President Pu Lal Thanhawla chuan 'Kan pasaltha ramchhuak ten Sai rawn hawn lo mah se, Sakhi, Sazuk an rawn hawn anih pawhin nunau hovin kawtchhuahah an lo hmuak ang a, a kaptu inah a lu kan tar ang' tiin remna leh muanna a tlangaupui thin a ni."

"Kum 1986 June ni 25 khan Congress party leh MNF chuan inremna an ziak a, he inremna vang hian Mizoram Peace Accord a lo piang thei ta a ni. Kum 1976 khan Union Home Secretary SL Khurana leh Pu Laldenga te khan inremna an lo ziak tawh a, mahse kha inremna kha a hlawhchham a, a chhan chu Pu Laldenga duh ber Chief Minister nihna an ken theih loh vang a ni. A tawp berah chuan Remna leh Muanna kan neih hi vawng nung zel turin ka sawm a che u" a ti bawk.