Aizawl May 29, 2023 : Vawiina Hrangtûrzo West Congress Block Conference, Khawlailung Community Hall-a neihah Congress Party President Lalsawta chuan Lal Thanhawla'n nihna a kian chu 'change' a thleng niin a sawi a, 2023 inthlan tura cheng nuai 200/300 nei tawh ho chu tibeidawng turin mipui a sawm.

Lalsawta chuan, "ZPM hian kalphung thar tih hi an sawi fo a, a sawia sawi ai chuan a taka tih a pawimawh zawk. Kei pawh hi Pu Lal Thanhawla'n President ni ve tawh rawh se min ti a. Khawi daikil kara mi nge tih pawh in hriat loh kha President ka rawn ni ve ngawt a, chu chu kalphung thar chu a ni. Hruaitu tha-in hruaitu tha dang a chher chhuak thin a. Inthlak danglamna (change) a lo thleng a nih hi!" a ti.

Congress President chuan, "Kum 2023 MLA General Election-ah hian party dangte nen kan intlansiak dawn a. Sawrkarna siam kan tum a, sawrkar satliah ni lovin sawrkar tha siam ngei kan tum a ni. Candidate hausa ringawt kan thlang dawn lova, mi dik leh mi rinawm, ram leh hnam tana a tha ber ber kan rawn vawrh chhuak dawn a. Campaign-na tura chêng nuai 200, nuai 300 ka nei tawh ti ho te hi chu ti beidawng teh ang u. Kumin hi a bultanna atan hmang ila, sum hmanga Vote lei tumte chu lo ti zak ula, lo hnawl ngam zel turin ka ngen che u a, hetiang mihring hi Mizoramin a mamawh lo a ni," a ti.

Lalsawta chuan, "Nitin kan tawngtainaah 'I ram lo thleng rawh se' tih kan chham thin a. Kan ramah hian Pathian ram tak tak a lo thleng em? Pathianin ram tha min pe a, mihring tha min pe bawk a. Mipuiin kan nghah mek chu sawrkar tha a ni. He sawrkar tha pe tur che u hian Congress Party hian kawng dik kan kawhhmuh che u a, kan hnenah hian lo kal zel rawh u, tiin mipui kan sawm a ni," a ti.

Lalsawta chuan, "Tang puihna hi kan sem dawn lo a, kan pe dawn a ni. Tang tak takte kan pui dawn a, kan tan tam poh leh kan ram a tha ang a, kan thawhchhuah a lo tam ang a, ramin hma a sawn phah dawn a ni. Phai atanga chawhmeh rawn lut te hi kan enfiah ang a, intodelh dan kan zawng ang. Kan Manifesto No. 1 angin mizo hnam hi hnathawk hnam ni turin kan siam ang a, mi taima hlawhtlinna atan chuan Congress Party chuan sum (budget) kan dah dawn a, thil harsa a ni lo a, kan ti ang kan tih chu kan ti tak tak dawn a ni," a ti bawk.