Aizawl : Mizoram Pradesh Youth Congress Committee (MPYCC) chuan Mizoram sawrkar-in sawrkar hnathawkte hlawh a hun takah pe thin turin an ti a, Local Council & Village Council hlawh a batsak mek chu pe thuai turin sawrkar an ti bawk.

Congress Thalai chuan, "Mizoram sawrkar hian a hnuaia hnathawkte hlawh a hun takah a pe ngai ta miah lo hi Congress Thalai chuan pawi kan tiin zahthlak kan ti hle a. Tlai taka hlawh a pe chhuak thin hian sawrkar hnathawkte dikna leh chanvo a rahbet nasa em em a. Loan la tan phei chuan phurrit a siamin, pawisa an chawibelh (penalty) thin a. Sum enkawl thiam lo MNF sawrkar kan hrawn mek hi vanduaithlak kan ti takzet a ni," an ti.  

MPYCC chuan, "Local Council leh Village Council te hnenah Mizoram sawrkarin thla sarih chhung (April 2022 atangin) lai an hlawh a batsak hi pawi kan tiin zahthlak kan ti a. A rang thei ang bera an hlawhte hi pe chhuak turin Mizoram sawrkar kan phut a. Mahni hna tuldangte kalsana khawtlang tana hnathawktute chanvo rahbehsaknaah kan ngai a ni," an ti bawk.