Aizawl July 13, 2023 : Mizoram Pradesh Youth Congress Committee (MPYCC) chuan Cabinet Minister K. Lalrinliana'n Kolasib Journalist te tanbik nei, an party awmna nen lam a hriat thu a sawi chu mak an tih thu leh pawi an tih thu an sawi a, ngaihdam dil turin an phut a, Kolasib district Journalist te thlavang an hauh tur thu an sawi.

MPYCC chuan Cabinet Minister leh Kolasib bialtu MLA ni bawk K. Lalrinliana chuan July ni 12-a KVK, Kolasib ram theh tum an en naah Mizoram Journalist Association, Kolasib District-te chu tan bik nei (bias)-ah a puh leh Kolasib-a Journalist-te chu an awmna party nen lam a hriat vek thu a sawi duh hial chu mak an tih thu leh pawi an tih thu an sawi. MPYCC chuan Kolasib District Journalist-te hmlakna an thlawp tih an sawi a, an thlavang an hauh tlat dawn ti Kolasib bialtu MLA K. Lalrinliana hi an hriat tir bawk.

MPYCC chuan Mizoram in Minister leh MLA kan lo neih tawh te zingah, Mizoram Journalist ten thudik leh thil dik hai lang tur a hma an lak na kawngah, mawi lo leh dik lo taka tawng khuma sawichhe duh tu hi an awm an la hriat ngai loh thu an sawi. Kolasib bialtu MLA K. Lalrinliana hian a tih loh tawp tur a tih bakah KVK, Kolasib ram theh tum chungchangah hian dik lo taka thil tih tum a nei tih a ti lang chiang hle ah an ngaih thu an sawi bawk. 

KVK, Kolasib ram theh tum chungchanga thil fel tawk lo awm ni a lang chungchang ah Kolasib Journalist te hmalak na chu MPYCC chuan kan thlawp tlat an ti a, Mizoram-in Journalist a neih chhuanawm tak tak te mipui hma-a Cabinet Minister leh Kolasib bialtu MLA ni bawk K. Lalrinliana'n a tawngkhum avang hian ngaihdam dil ngei turin an phut bawk.