Aizawl May 29, 2023 : Vawiin khan Congress Thalai Hqrs. (MPYCC) chuan an Sr.Vice President Ngurdingpuia Pachuau hovin Chief Minister Zoramthanga hnenah lehkha an thehlut a, CM hi a lo awm loh avangin a PS hnenah an hlan. An lehkha thehluhah hian Kolkata Ballygunge Mizoram House hralh tum a nih chungchang te, Manipur atanga raltlan-te chhawmdawl tura Mizoram sawrkar an phutnate leh Covid hrileng avanga sawrkar-in sum a dawn te a hman dan mipui hmaa puangzar tura an phutna te a tel. 

Sawrkar-in Ballygunge-a Mizoram House tihral a tum chu MPYCC chuan tha an ti lo chungin an do ngawr ngawr lo va, amaherawhchu,tihral a nih hma hian hralh a ngaih loh nana tih theih awm ang angte tih hmasak phawt ni se an ti. "Kolkata Municipal Corporation hnuaia an building regulation (G-3) hi inngaihhnathiamna awm thei lo tawp a nih kan ring lo va, Salt Lake-a Mizoram House sak a nih dawn pawh khan tuna sak a nih ang thlap khuan sak phal a ni lo va, mahse, khatih hun laia Chief Minister Lal Thanhawla khan hriatthiamnate dil-in tuna an sak ang khuan sak an phalsak ta a ni. State pakhat dilna chu an zahsak em em ang tih kan ring tlat a ni," an ti.

2019-a sak that lehna tur ruahmanna leh phalna pawh a awm hma hauha a building thiah a ni chu pawi an tih thu an sawi. Ballygunge-a Mizoram hi tihral a nih dawn chuan tihral a nih hmain tihfel hmasa tur leh ngaihtuah fel ngai ni te CM lehkha thawnah hian an tarlang bawk. 

Manipur atanga râltlânte hi nasa taka chhawmdâwl an ngai a, kan hriat theih chinah tun thlengin chhawmdawlna tih tham sawrkar atangin an la dawng lo va, nunau la chhangchhe tak tak, an thuamhnaw inbel lai nen chauha rawn tlânchhe lût te an ni a. India khua leh tui an nih angin Central sawrkar pawh che ngei tura na taka nawr ni se kan ti bawk. Tin, anmahni'n a râlmuang tâwka an hriat hma chu Mizoram atanga chhuahtir loh ni se kan ti bawk a ni.

Covid puala CM Relief Fund-a pawisa lut tam tak, Central atangin Covid tanpuina sum tum riat (8) a lokal nia an hriat, a vaia belhkhawmin Rs.79,62,88,000 (cheng nuai sang sarih zakua sawmruk pahnih leh sing riat sang riat) leh CM Relief Fund-ah Rs.26,79,80,470 (cheng nuai sang hnih zaruk sawmsarih pakua leh singriat zali sawmsarih) te chu hman lohin a la awm a ni loh chuan a hmanna mipui hnena puangzar turin CM-an ngen bawk a ni.