Aizawl : Mizoram Praesh Youth Congress Committee chuan nimina thuchhuah an siamah, Zirtawpni December 11, 2020 kha MNF Lok Sabha MP C. Lalrosanga'n min phatsan ni champha a ni, tiin MNF Sorkar chu, kan ti ang an tih apiang kalha thil tih chingah an puh a, zia Mizo mipuite chu hre reng turin an chah.

MPYCC chuan, “Mizorama rorel lai party-in MP Lok Sabha C. Lalrosanga kal tlanga India ram rorelna sang ber, Parliament House-a, Mizoram mipuite duhdan leh kan sakhaw hruaitute duh dan kalha Citizen Ammendment Act duh lama phara min phatsan hun kum khatna a lo thleng leh ta. Mizoram History atana Black Day ni kum khua tawh tur Parliament-a kan hnam leh sakhaw him lohna tur CAA lam tana MNF leh Mizo mipui aiawh C. Lalrosanga MP, Lok Sabhai’n bân a phar ni hi i hre reng ila. Lalna duh vanga hnam leh sakhaw hralh duhtute thil tih dan hi thang leh thar chhuan lo la awm zel tur hnenah kan lo fimkhur zawk nan i hrilh chhawng zel ang u," an ti.

Kum 2019-a MP Inthlanah MNF khan na taka CAB do an au pui a, kum chanve tlin hmain an thu aupui an theihnghilh lui a nih kha. CAB thlawptu mai ni lo, CAB/CAA vanga Parliament meuha Mizoram mipuite aiawhtuin lawmthu a sawi ta zawk kha thil rapthlak tak a tling, an ti zui bawk.

Congress thalai chuan 2018-a Mizorama MNF-in Sorkarna an siam theih chhan chu Central BJP Party a ni tih BJP Spokesman Mmhonlumo Kikon-in a rawn tawh a. Chuvangin MNF party hi Hindu lal ram siamtumte thawhpui luitu leh an sangawizawnpuite an nih chian zia zep rual lovin pho lan a ni tawh, an ti bawk.