October 27, 2022; Congress thalai chuan MICE School, Tuikual building sak zawh tawh chu engvanga tun thlenga la luah loh nge a nih tih education minister an zawt a. Estimate leh drawing anga sak a ni chiah em tih pawh sawifiah thuai tur leh a hmuna tlawh ve ngei turin an phut.

Thuchhuah an siamah congress thalai chuan, tunhnai khan congress thalai Hqrs (MPYCC) chuan Mizoram Comprehensive Education (MICE) School (Higher Secondary & High School building) sak a that tawk loh thu a dawng tih tarlangin, he an thudawn bawhzui hian MICE School Tuikual chu nimin October ni 26 khan kan tlawh tih an tarlang.

Congress thalaite hmuh dan chuan verandah tlakdal (iron railing) a nghet tha tawk lova, siam zawh vek tawh hnua tihngheh chawp lehna hnu hma pawh tam tak a awm. Classroom tur chhawng li-na tukverh sang takah tlakdal siam a ni lo chu zirlaite tan a hlauhawm thei dawn niin an hmu bawk.

Cogress thalai thuchhuah tarlan danin, building hnuai ber  (ground floor) chu a bang (wall) a awm loh avangin lirnghing palhah a building pumpui tan a hlauhawm thei hle dawn a. Septic tank pawh a building nena in phu lovin a te (small) em em a, tuihawk luanna (drain) mumal taka siam a ni lo bawk.
 
"MICE School building sakna tur sum hi congress sawrkar laia NEDP sum atanga sanction vek tawh a ni chunga hetianga luah that ngam loh khawpa sak a ni hi congress thalai chuan pawi kan ti em em a ni," an ti.