Aizawl June 5, 2024 : MPYCC chuan 2024 Lok Sabha Inthlanpuiah India ram pumah Congress Party-in MP 99 ngawt an nei chu lawmawm an ti a. 2019 Lok Sabha inthlan aiin seat 47 in Congress chuan a la hnem zawk leh Aizawl khawpui chhung Constituency hrang hrang leh veng tam takah kum 2023 aia Congress-in Vote a lêta a hmu tam zawk chuan India ram pumah Congress Party-in sawrkarna a siam leh thuai dawn a ni tih a tichiangah MPYCC chuan an ngai.

Manipur-ah Kristian te leh Zohnahthlak nasa taka sawisatu BJP sawrkarnaah Congress-in MP an nei fai vek leh MLA zawng zawng BJP an ni vek chunga Congress-in MP an neihna Nagaland-a thil thleng chu Pathian remruatna leh ringtute tawngtaina rahah MPYCC chuan an ngaih thu an sawi bawk.

MPYCC chuan Lok Sabha MP inthlan tluang taka neih a nih hnua inthlan result pawh tluang taka puan a nih avangin lawmawm a ti a. Ram leh hnam siam tura rilru fel leh nghet tak pu chunga huaisen taka Congress Party aiawha ding Lalbiakzama chu MPYCC chuan an chhuang a. Inthlan buaipuitu sawrkar Official-te leh MPF te, vote chhiar buaipuitu sawrkar mi pawimawhte leh Party mite chungah lawmthu an sawi.

MPYCC chuan Mizoram mipuiin duh taka an thlan ZPM Candidate Richard Lalhmangaiha a lawmpuiin duhsakna a hlan a, ram leh hnam, sakhaw tana nghet tak leh dik taka ding tlat turin an beisei a ni.