Aizawl July 17, 2023 : ZPM Leader Lalduhoma chuan tunhnaia Guwahati-a a zin chungchang ZPM chhung inkhawmah a sawi a, BJP paih chu inthlan lo awm tura theihtawp an chhuahna tur niin a sawi. Guwahati a kal chhanah Congress chhan tul a tih loh thu a sawi a, an hre duh a nih chuan NDA-a BJP thawhpui MNF zawt mai turin thurawn a pe.

ZPM Leader chuan sakhaw zalenna pawimawh a tih thu sawiin, “India ramah hian Secular Force a lo pian a, MP inthlan leh hunah hian BJP kan paih theihna tura theihtawp lo chhuah tawh leh chhuah zel tur kan ni. Kumin MLA inthlan lo awm turah hian tumah thawhpui kan tum lova, lo tum pawh ni ila mi dang sawisak kan ngai lo. Delhi chaknaa innghah kan tum lova; Kan innghahna chu Pathian a ni. 'Chakna ni lovin, thiltihtheihna ni lovin ka thlarau zawkin le' tih hi kan innghahna a ni," a ti. 

Lalduhoma chuan, "Tun hnaiah Guwahati-ah a thlawk thla a, BJP nen an zuk inhmu a, Car varah a chuang tih te, Delson-a a kalpui, an ti thul. Fate buaipuia kan zinna thu hi Congress party hi ka hrilh zelna chhan tur ka hre lova, BJP chungchang an hriat duh chuan an thawhpui MNF te hi zawt mai se tih hi ka rawn duh a ni. Pu Sapa nen kan inkar lah an sawi chawl thei lova, an sawi nasat poh leh kan inngeih tial tial a, anni sawi then theih kan ni lo. 2018 inthlan zawh atanga an sawi tawh hi lo la sawi zel se, keini erawh kan lo inpumkhat tual tual dawn a ni. Thu thing deuh deuh pawh vawi sawm chuang te an post peih a, heti taka min bei chung pawhin kar tin mi sanghnih chuangin kan pung zel a ni,” a ti bawk. 

ZPM atanga chhuak te chungchang sawiin Leader chuan, “Kan party atanga chhuak ta kan hruaitu duhawm tak tak pahnih pathumin min chhuahsan a, kan ui hle a, candidate atan pawha kan iai loh tak tak an ni. Kan bawm a tawt si avangin an beisei ang kan tihsak thei lova, tuman i vawm zui lovang u. An awmna party tharah pawh kalphung thar lo va hmang zel se tiin ka chah duh a ni. Fake Account hmanga tawngkam chhe pui puia ZPM nia inchhal ten min beihna hi tam tak a awm a, Social Media hman kawng fimkhur zel turin ZPM mi leh sa chu kan inchah thin a, zawm pawh kan zawm tha hle a ni. Fimkhur zel ila, tute emaw min beihna avang hian nghing tur kan ni lova, hmalam panin ke i pen zel ang u,” a ti bawk.