Covid 19 chu khawvel mithiamte zuam ang ngawt a ni ta lo, khawvel ram changkang leh hmasawn USA leh Europe ram te chu he natna avanga buai nasa ber ber te an ni ta zawk hial mai.

India ram ngei pawh he natna hian min zuah lo a, nitin a hri vei thahnem tak hmuh belh zel a ni a, thi pawh an pung chho mek zel bawk. He natna enkawl dan leh invenna hi hmuhchhuah tumin khawvel mithiam ten nasa takin tan an la a, vawiin thlengin chanchin lawmawm lam erawh hriattur a la awm hrih lo a ni. He natna hian eng chen nge min tihbuai dawn hriat a ni lo a, mithiam thenkhat phei chuan a vanglai a thleng chho dawn chauh ni te'n an sawi a, a thim zawnga thlir phei chuan thil huphurhawm tak a ni.

Mizote ngei pawh he hri hian min zuah bik lo a, March thla tawp lamah he hri vei mi 1 hmuhchhuah a niin Zoram Medical College-ah enkawl a ni a. Doctor te chuan a dinhmun a ziaawm chho zel nia sawiin nitin hma a sawn tih an sawi avangin a lawmawm hle a. Tuna ZMC a enkawl bakah Mumbai lama Cancer damlo leh anmahni awmpuitu zingah pawh hri vei hmuhchhuah a ni a. Shillong lamah pawh he natna hri avang hian (?) Mizo Doctor chhuanawm tak chu vanduaithlak takin a boral tawh bawk a ni.

He hri hlauhawm tak avangin mi tam tak thi tawh mahse a damchhuak erawh an tam daih zawk avangin lo chiai buai lutuk erawh a fuh lo. Chutih rual chuan he hri lakah hian Mizoram hi a him reng bik ang em tih chu zawhna pawimawh leh chhan har tak a ni thung. May ni 3 ral hnuah lockdown hi kan la chhunzawm zel ang em? Doctor thiam ten chhunzawm zel duh mahse kan ram economy in a tuar nasat zia en hian chhunzawm zel chi a ni lo mai thei bawk. Lockdown hi tihtawp ni ta se hripui hi a darh hluai mai ang em tih te chu zawhna chhan har leh pawimawh tak si a ni ta.

Tun dinhmuna Mizoram ala him chhan hi mipui ten thu kan awih vang ni berin a lang. Chuvangin Covid 19 laka kan himnan ina awm tam, midang nen inhnaih loh (social distancing), kut silfai that leh hmaituamna vuah te hi kan uar thar leh a pawimawh hle.