ZALEN March 13, 2025 : Congress chuan LADC-ah Congress leh MNF-in sawrkarna siamin tluang taka a kal lai mekin paihtlak thut a ni a, sawrkar lai ruahmanna thuk tak nen V. Zirsanga chu CEM tur atan lakluh a ni, an ti a, ZPM sawrkar chu corruption haw tak tak lovah an ngai tih an sawi.

Congress chuan V. Zirsanga hi Corruption Case-ah kum 4 tang tur leh Rs 4 lakhs chawi tura a tih a ni a. Special court (prevention of Corruption Act) judge HTC Lalrinchhana chuan January 19, 2024 khan IPC Section 120B (Criminal conspiracy), IPC Section 409 (Criminal breach of trust by public servant) leh IPC Section 420 (cheating) leh Prevention of Corruption Act hnuaia executive member LADC in-charge education a nih laia vbch 1.33 tichingpen a ni an ti.

Congress chuan Assembly House-a House Leader leh CM ni bawkin Lawngtlai West Bialtu C. Ngunlianchunga hnenah anticipatory bail la turin thurawn ka pe, a ti ta mai kha a vanduaithlakin a pawi an tih thu an sawi.

MPCC Treasurer Dr. Lalmalsawma Nghaka chuan "Mizoram-a rorelna in kan neih san ber Assembly House zahawmna a tihbawrhban phah hle in kan hria a. Mahni MLA pui thamlo tak leh invauna anga ngaih theih thil kha thleng tawh lo se kan ti hle a ni," a ti.

MPCC chuan Chief Minister chu zawhna zawtin, "C. Ngunlianchunga hian Anticipatory Bail la turin khawi court-ah nge thubuai a neih Mizoram mipui min hrilh turin kan duh hle a ni. Kan CM zahawm tak hian Mizoram mipuite hmaah special court (prevention of corruption Act) in eirukna thubuaiah thiamloh a chantir tawh LADC CEM atan an dah ta mai hian corruption do a hnekin mi corrupt te dinhmun pawimawhah dah pawi an ti lovin corruption hi hmui chauhin an do ta mai em ni kan ti a ni," an ti.

"September 13, 2024 khan kan Chief Minister hian Pu V. Zirsanga phone a bia in, Pu Zir, I hova LADC-a sawrkarna siam kan duh an tiha kha thudik ngei a ni em? tih hi Mizoram mipui hian kan hre duh bawk a ni."

"CM leh Pu V. Zirsanga 13.09.2024-a an inbiaknaah kan CM hian hengte hi a tiam reng em ni? (Personal thil bakah) - 1) Provincialised School 18 LADC kuta hlan 2) Ngengpui Wildlife Sanctuary leh Phawngpui National Park te LADC kuta hlan 3) Officer Post 20 dawn lakna tur permission pek 4) CEM Bangla tur SASCI hmanga thawh nghal. Heng hi Pu V. Zirsanga’n ni 10.2.2025 khan a In-a leng MNF MADC 10 te hnena a sawi nia hriat a ni. Heng hi thudik a ni em tih kan CM zahawm tak hian Mizoram mipuite hmaah puang turin kan ngen a ni," an ti bawk.