Aizawl: Chief Minister Zoramthanga hova Council of Ministers meeting chuan sawrkar hna-thawk hlawh thenkhat chu pek kim hrih loh a, boruak that huna rulh leh turin an rel.

Nimin khan Chief Minister Zoramthanga chuan CM Conference Hall-ah chanchinbumite kawmin Zirtawpni kaltaa Council of ministers thurel thenkhat hi a sawifiah a. Chief Minister chuan, "A mamawh angin sawrkar hnathawk hlawh hi a percentage (10%/15%) in pek hrih loh a, boruak that leh huna rulh leh turin a rel a. Sawrkar laipui atanga sum a lokal loh chuan eitur leina kan nei lo ang tih a hlauhawm a ni," a ti. Chief Minister chuan hlawh bat sak chu Finance department kutah dah a ni tih sawiin sum dinhmun en chungin a tul tawpah ruahmanna an siam dawn niin a sawi a, hna hniam lam thawk te chu hlahthlem turin an ti niin a sawi. CM chuan inrenchemna kalpui tum a ni tih sawiin office inrelbawlna (expense) tih tlem, petrol hman tih tlem, zinna senso tihtlem te an tum niin a sawi bawk.

Chief Minister chuan Covid 19 hma chuan pawisa a tam tih chu a sawi ngei niin a sawi a, "Tunah chuan sumdawnna hmun zawng zawng khar anih tak avangin nun a danglam vek tawh a, sawrkar laipui atanga kan sum hmuh a tlem a, chuvangin kan sum dinhmun dik tak sawi a har hle a. Tun dinhmunah ways and means advance la puk lo mah ila, kan sum hmuh hi a tlem dawn avangin kan hman puk hi a la ngai ngeiin a rinawm," a ti. Covid fund chu dik taka hman a ni tih sawiin Chief Minister chuan, "Sum hmanna tur hi YMA, Kohhran hruaitu te nen rel a ni a, a hmanna hi MLA te a copy kan pe bawk a, rinhlelh tur a awm lo a ni," a ti a. Covid fund ah vaibelchhe 7 vel hmuh a ni tawh tih sawiin, "Mi hrang hrangin an thawhkhawm hi ropui kan ti a, kan sum dinhmun a harsat avangin a thei a piangin thawh se kan lawm ngawt ang," a ti bawk.

State danga Mizo awm, Mizorama lo haw duh mi harsa an awm chuan an haw na tur sawrkarin tum sak zel a inhuam tih Chief Minister chuan a sawi a. "Sawrkar chuan tangkhangte rel, motor leh thlawhna hmanga an haw theihnan hma kan la reng a, hemi atan hian state dang Chief Minister te nen kan inbe reng a. Kan state a tangkhang te a theih ang angin kan pui a, state dang te pawhin an pui bawk a. State danga Mizo tangkhang ten Mizoram House-a an ei leh in man chu sawrkarin a tum sak a ni," a ti. Chief Minister Zoramthanga chuan mi thenkhat ten an state a an hawna turin Central in 85% a tum tur ang leh state in 15% a tum tur anga sawi chu thuthang mai mai leh engmah order awm lo niin a sawi.

Lockdown laiin Lengpui airport chu cheithat mek a ni tih Chief Minister chuan sawiin, "Thlawhna tum kawng (runway) siam hna leh runway sira tui tling paih hna kan zo tawh a, Hmunpui tlangah DEVOR bunin hnathawk theiin kan siam zo tep a. Hei bakah hian parking bay te, runway lighting, hnim sam, passenger te awmna leh bungraw tawlhna siam hna te thawh leh kan tum mek a ni," a ti. Hmunpui tlanga DEVOR dah thar chu a tha hle nia sawiin Chief Minister chuan, "Tuna thlawhna ten tum nana an hman hi kum 20 chuang a ni tawhin a hlui tawh a. Kum 2013 khan AAI chuan khawl thar min pe a, mahse kum 5 lai mai hman lohin a lo awm a. AAI lam pawhin lak kir an tum hman hial a, mahse kan sawrkar hnuah khawl hi kan bun thei ta a ni," a ti bawk.

Chief Minister chuan Mizoram in chak a lakna kawngpui te chu fur anih dawn avangin cheithat mek a ni tih a sawi a. Naktuk Thawhtanni hian Bairabi leh Vairengte tlawh a tum niin a sawi. Chief Minister hi Home Minister Lalchamliana, I&PR Minister Lalruatkima leh Addl. Chief Secretary JC Ramthanga ten an tawiawm a ni.