Aizawl September 27, 2023: Vawiin khan Chief Minister Zoramthanga hovin CM cabinet meeting room-ah Council of Ministers chu sawrkar department hrang hrang atanga thu pawimawh lutte ngaihtuahin an thukhawm a, School hrang hrang te an dinhmun pangngai atanga dinhmun sang zawka hlankai chu thurel an pawm zinga langsar zingami a ni.

School engemawzat te chu tuna an dinhmun aia sang zawka hlangkai tura School Education Deaprtment in rawtna an thlen chu pawm a ni. Lumpsum Grand-in-Aid, Provisional Adhoc GIA te sum dawn thin pawh enthat tura tih niin school engemaw zat chu provincialised tura pawm a ni bawk.

Transport Department atanga rawtna, Mizoram Motors Vehicle Rules, 1995-a rule 54 na, lirthei (motor vehicles) registration kaihhnawih siamthat (Amment) phalna dilna chu phalsak an ni. 

GAD atanga lut Social Welfare & Tribal Affairs Department tih chu a hming thlak a, Social Welfare, Tribal Affairs, Women & Child Development tia thlak tura rawtna chu pawm a ni.

Irrigation & Water Resources Department ten Mizoram Water Resources (Management & Regulation) Bill, 2023 an thehluh chu pawmsak a ni.

Art & Culture ten Mizoram Public Record Act, 2011 siamthat (Amendment) an dilna chu pawmsak a ni.

I&PR Department ten Proposal for repeal of the Mizoram Exhibition of Films on Television Screen (Through Cassette Players) Act, 1990 an dilna chu pawm sak an ni a, Mizoram Journalist Pension Scheme, 2023 ngaihtuahsak tura ngenna an thehluh chu pawm a ni bawk.

Heng bakah hian 'One time relaxation for regularisation of contract & PE Employeee outside the prescribed qouta' chu sawi ho a ni a, a thuphungin (in principle)  pawm a ni. A kalpui dan tur kimchang lo buatsaih turin DP& AR leh Finance Department te chu ruat an ni. 

Aizawl North College hmun tur te, Ramhlun Venglai  Hall hmun tur te, Zuangtui Presbyterian kohhran Biakin hmun  te leh Chaltlang Lily Veng MUP te ram tur chungchang sawiho a ni a.  Land Revenue & Settlement Department lamin a tul angin a hma lo la se, a kaihhnawih Department dang te leh khawtlangho rawn chungin bawhzui se an ti bawk.