August 11, 2023; Special Judge (PC Act) chuan sawrkar sum eiru a puh, Dr. N Palai chu thiam loh chantirin, jail a dahlut nghal turin a ti a, August ni 14, 2023 ah hremna a puang ang.

Thubuai remna a kimchangin :-

S.R. (PCA) No. 02 of 2014 Ref. ACB PS Case No. 6 of 2010 dated 02.08.2010 u/s 13 (2) r/w 13 (1)(c) &(d) of PC Act, 1988 with sections 409/420/477A of IPC Complainant: State of Mizoram By Advocate’s : Mr. C. Lalrinchhunga, Addl. PP Versus Accused: Dr. N. Pallai S/o Leipo (L) Zarkawt, Aizawl By Advocates : 1. Mr. A.R. Malhotra 2. Ms. Lalrinpuii Tochhawng 3. Mr. T. Tlanthianghlima

He thubuai hi Dt. 13.1.2010 ah Superintendent of Police, ACB hnenah Pu Vanlalruata, President. PRISM leh Pu R.L. Liantluanga, Gen. Secretary, PRISM te thubuai theh luh atanga rawn irhchhuak a ni. Dr. N. Pallai, chutih laia Mission Director, NRHM leh Director, Health Services Department ni bawk laka thubuai an put luh chu- October, 2009 khan atak huaihawt silo in tum li lai zir hona (Workshop) nei angin chuta sumpai senso ₹ 4,19,360/- (Cheng nuai li, singkhat, sangkua, zathum leh sawmruk) chu ei ru a puh a ni in, hemi ₹ 4,19,360/- hi Dr. N. Pallai an a lokawl, hnuchhui a nih avangin Account section lama a lo dah let leh chu ACB te hian an man nghe nghe a ni.

Kum 2008 ah Contractor pawh nilo Pu Hunliannghaka, Baktawng hmingin Health Sub-Centre sawm (10) thawmthatna tur hna pechhuak in a vaiin ₹ 35,40,000/- (Cheng nuai sawmthum panga leh singli) man zet a ni.

He hnathawhna Bill hi Pu Hunliannghaka hmingin Cheque-a pekchhuah a ni na a, Mizoram Rural Bank, Dinthar Branch a Dr. N. Palaia Bank account kaltlanga lakchhuah a ni thung. Melriat Sub-Centre, Keitum Sub-Centre and Dampui Sub-Centre te hi a bikin an hnathawh leh sum sen hi a inmil lo hle tih hmuhchhuah a ni bawk.

Tichuan, a lo ber ah ₹ 11,85,533/- hi sumpai hlepruk a hmuhchhuah a ni. Kum 2007 khan Pu Lalrinliana, Republic Veng, Aizawl hmingin PHC 19 zet te thawmthatna tur Work Order pekchhuah a ni a, damdawiin pakhat zel tan hian ₹ 50,000/- zel hisap a ni. Tichuan, Bill lem hmangin pawisa ₹ 9.5 Lakhs (Cheng nuai kua leh sing nga) chu lakchhuah a ni a, he pawisa hi a hmanna tura hman a nih loh bakah Dr. N. Pallai-a hnenah hlan a ni a, Pu Lalrinliana hian a hminga hnachhuak hi a lo hre lo hrim hrim bawk.

PHC 15 te hi thawmthat an ni lo hrim hrim tih hmuhchhuah a ni bawk. August, 2007 leh October, 2007 chhung hian PHC 36 zet te rawnghnawih thatna tur PHC pakhat atan ₹ 50,000/- zel hisap in Bill lem hi siam a ni a, heta PHC 24 zet te hi ataka rawnghnawih that ni miah lo hemi atana ruahman sumpai hi eiruk ni ngei a hmuh a ni.

A chunga puhna hrang hrang ah hian court chuan ACB lam hian an thubuai hi an finfiah zo a ni ti a thutlukna siam in Dr. N. Pallai hi section 409/420/477A and u/s 13 (2) r/w 13 (1) (c) (d) of PC Act, 1988 hnuaiah thiam loh chan tir a ni a, ACB te pawisa man ₹ 4,19,360/- (Cheng nuai li, singkhat, sangkua, zathum leh sawmruk) pawh hi sawrkar pawisa sumpai tura chhuhsak (Forfeit) nghal a ni bawk.

Hetih lai hian sawrkar dan leh hrai leh kalphung ang nilo a computer pahnih Lunglei Civil Hospital tih changtlunna tur sumpai ₹ 1,54,694/- (Cheng nuai khat, sing nga, sang lo, zaruk, sawmkua leh pali) hmanga a lo lei thu ah chuan, hei hi chu ama mimal sumpai tur leh hamthatna tur bil atana hman khawlohna finfiah a nih loh avang in sawrkar hnathawk a nih anga achunga thuneitu ten sawrkar hnathawk te inkhuahkhirhna dan (Disciplinary proceedings) hmanga hrem tur zawk a ni ang ti in Court chuan criminal thubuai ah chuan thiam a chan tir thung.

Court in thiam loh a chan tir Dr. N. Pallai hi Bail a alo chhuah tawhna chu hnawl (Cancel) nghal a ni a, Jail ah dah luh nghal tur a ni in, Dt. 14/8/2023 hian a hremna tur court ah ngaihtuah a ni ang.