Aizawl: CSS Hindi Teachers’ Association chuan Mizoram sawr-karin High Court thutlukna ngai pawimawh lova, court-a sorkar advocate thusawi chu sawrkar-in re-correction tih tir tuma High Court-a thu an thlen leh chu an hriatthiam loh thu leh court order re-correct lova  re-engaged mai turin an ngen thu an sawi.

Nimin khan CSS Hindi Teachers Association te chuan chanchin-thar thehdarhtu te an kawm a, he hunah Mizoram CSS Hindi Teacher president Lalchhuanliana Parte chuan, "Sorkar hian Court Order re-correct a tum chhan ni a lang chu kan zingah untrained a tam zawk kan awm vang niin a lang a. Supreme Court Order 2019 in Recruitment Rules (RR) a tihchhuah ah Trained teacher te chauh classroom chhung ah an lut tur a ni a. Untrained teacher la awm te pawh 2019 hmaa trained chhuak hman vek turin thu a chhuah. CSS Hindi Teachers te hian 2011-17 inkarah te khan training min phalsak turin kan ngen thin a, a hun laiin duh mah ila trained phalsak kan ni ve lo. SSA, RMSA, Private Teachers, ADHOC teachers te pawh Multi-Mode leh private-a trained tir laiin keini CSS Hindi Teachers te chu trained phalsak kan ni ve lo," a ti.     

CSS Hindi Teachers te chuan khatihlaia state sorkar khan an dikna chanvo a palzutsak avangin kum 2018 khan High Court ah an zualko tih an sawi a, 21.10.2021 khan High Court chuan an chungchang-ah order a ti chhuak a. “High Court Judgment chuan keini Mizoram CSS Hindi Teachers, 2017 a bân tak te chu re-engaged leh vek kan nih tur thu a puang a ni. High Court Order-a a lan dan in Sorkar advocate Linda L. Fambawl chuan sorkar atanga thu a hmuh angin Petitioners te daih tawk post a awm thu sawiin, CSS kaltlangin heng Hindi Teachers te hi qualification an neih anga Samagra Shiksha Project hnuaiah re-engaged an nih tur thu a sawi a ni,” an ti.

High court Order in re-engaged leh vek kan nih tur thu a lo chhuah tawh chu untrained kan nih avanga sorkar-in tihdanglam a tum chu CSS Hindi Teachers’ Assn. chuan mihring dikna chanvo palzutna lian takah an ngai tih an sawi. "CSS Hindi Teachers te hmakhua ngai em em thin tu kan sorkar zahawm tak chu court order re-correct lova min re-engaged mai turin kan ngen a ni," an ti.

Ban an nih takah khan nawrhna pawh an huaihawt thu an sawi a, hetihlaia hian tuna sawrkarna siam mek hotu tam tak chuan min rawn hnem nasa hle an ti a, Chief Minister ni mek pawh hi an hmuh thu an sawi a, an thil ngen chu tihhlawhtlin harsa a nih loh thu te an hrilh niin an sawi a, inthlan-ah pawh khan an hna ngai an chelh leh ngei beiseiin theihtawp an chhuah thu an sawichhuak. "Court pawh thutlukna a siam vek tawh hnua min hnawl dan an  zawng ringawt hi kan hrethiam lo a ni," an ti. 

CSS Hindi Teacher te sawi dan chuan Assam sawrkar chuan central lamah utrained teacher & un-Qualified teachers te training na hun leh un-qualified teacher te mahni an lo in upgrade theihna atan kum 5 hun relaxation pe turin a ngen sak a, Ministry of Human Resource Development (MHRD), Dept. of School Education & Literacy, Govt. of India chuan a pawmsak ta a ni, an ti a. Assam sorkar-in Central sorkar a ngen ang hian Mizoram sorkar zahawm tak pawhin a duh chuan min dilsak thei a ni tih kan hria a, hemi chungchanga hma min laksak turin Mizoram sorkar hnenah ngenna/ dilna lehkha ni 15.11.2021 khan thlen a ni tawh, tih an sawi bawk.