• Dr. Lalbiak Kima
• Tunlai chu veng hrang leh khaw hrang hrangah “Covid 19 a kâi leh ta” tih thâwm leh sample testing an tih mek thu hi kan hre chamchi a ni ta ber mai. Chuvangin, engang chiah a hri hi kai awl nge a nih leh mitin ngaihchân sample testing chungchang hi lo hriat chian tum ila. Heng atang hian fimkhur dan thar kan zir nghal zel bawk ang chu.
  
• KÂI A AWL
  He Corona virus hi natna hrik zawng zawnga tê ber chi a ni a. Kâ, hnâr leh mit atang chauhin taksa an lut thei tih kan hria a. Hetia an an luh hnu hian hrawk leh hnâr kawtawp (nasopharynx) velah an inthlahpung ta chiam thin a ni. Heng hi khuh/hahchhiau zawng te, kâ leh hnâr khawih atangin midangin an kai darh ta thin a ni. A rei deuh hnu chuan chuap lamah an chhuk thla thin. Hei vang hian Covid 19 hi chuap natna tih a ni reng a ni. A veite êkah hian a hrik a chhuak bawk nain, êk atanga inkaidarh hi chu report a la awm rih lo. Sahbawna kut silfai ziah chu a tha ngei ang.
  
• A vei mekten natna hrik (viral particle) an thehdarh dan chu hetiang hi a ni?(source: CDC, USA, 07/06, 12:10).
  
• Natna hrik kaite atang leh hmun hran hrana a hrik an hnutchhiah atanga mi dangin an lo kai ve a ni ber.
  
• COVID 19 kai tur hian viral particle (vp) engzat nge kan mamawh le? A CHHANNA chu: a tlem berah a hrik sangkhat (1000 vp) tal kan taksaah a luh a ngai a ni. A hrik pai positive-te hian an khawsakna vela natna hrik an thehdarh theih dan lo thir phawt ang. THÂWK (Breath): Minute khat chhungin a hrik 20 vel an thaw chhuak thei. (20 vp/min) TAWNG (Speaking): Minute khat chhungin a hrik 200 vel tawng zawngin a chhuak thei (200 vp/min). Chuvangin minute 5 aia rei inbiak hian kai theihna (chance) a sang. KHUH (Cough): Khuh hian natna hrik maktaduai zahnih (200 million vp) vel a per chhuak thei a. Heng hrik khuh chhuahte hi pindan khar khip (poor vetilated room)-ah chuan rei tak boruakah an châm thei. Chuvangin, a kaite nena inchhung (room) hmun khata awmho reng a him lo. HAHCHHIAU: Hahchhiau hian virus maktaduai 200 (200 million) vel bawk an chhuak thei. Chuvangin, khuh/hahchhiau hian kut lawnga hup lovin tissue paper paih mai tur emaw, kiu (elbow) kawrchhana inhup emaw ngei tur a ni.
  
• Khing khi natna hrik pai tam (High viral load) hoah a dik tlangpui. SAMPLE TESTING atang kan hriat theihte. (source, ICMR-NIOH, Ahmedabad): Sample testing an han tih hian test-na RT-PCR, TRUENAT khawlte hi chuan a hrik pai tam leh tam loh an hre thei nghal a. An pai tam dan azirin hetiang hian an then.
  1. Hrik pai tam (High viral load) - 17 to 24 Ct. (cycle threshold): Heng hrik pai tam ho hian natna (Symptoms) khawsik, khuh ro, hrawkna etc an nei a, thawhah pawh an nei thei. A kai darh nasa thei (super spreader) an tihte an ni a. A tlangpuiin a kaiho zinga 8-10% vel an ni thinin Gujarat-a an zirnaah chuan an hmuchhuak a ni. Anni hi chu khung hran ngai an ni. Contact tracing pawha umzui nasat ngai an ni.
  2. Hrik pai tam lutuk lo (Moderate viral load) - 24 to31 Ct.: Anni hi 10-15% vel an ni tlangpui a. Hri an thehdarh thei a, natna symptoms an nei thei a. A chunga mi ho ai chuan an zia awm deuh.
  3. Hrikpai tlem (Low viral load) - 31 to 38 Ct.: Hengho hi positive zingah a tam ber 75 %-80% vel an ni thin. Hengho hian natna an nei hran lo va, hritlang satliah leh awm nuam lo deuhte an nei ve thin. Asymtomatic kan tihho hi an ni. Natna an thehdarh ve thei nain an thehdarh nasa vak lo thei bawk. Contact tracing-ah pawh umzui nasat an ngai vak lo deuh. An sample test result-a 34 Ct chung lam phei chuan mi dang an kaichhawng vak lo tura ngaih an ni. Enkawl ngai loa an dam leh mai thin avangin state tam takah chuan in lama enkawl ‘Home Isolation’ an duh tawk. Hetianga inenkawl hi kan state thenaw,m Manipur leh Tripura pawhin an tan tawh. Kan hmabak a nih hmel e.

HRI KAIHO HI ENG CHEN NGE AN HLAUHAWM?
Natna langchhuak nasa loho (Mild to moderate) hian insawiselna (symptom) an neih atanga kar hnih chhung (14 days) mi dang an kai chhawng thei.
A damlo nasa leh hrik pai tam (Heavy viral laod) ho hian a natna lan chhuah atanga kar thum (21days) chhung mi an kai chhawng thei. Hetiang hnuah hi chuan tumah an hlauhawm tawh loa ngaih a ni.

TEST-NA KHAWLTE
RT-PCRT KHAWL: Hei hi khawvel pumin an hman lar ber a ni. Natna hrik a hmuh theih dan hi 80% vel a ni (sensitivity 75-85%). He khawl hi a laksawn ve theih loh. Natna hrik pai dan viral load a hriat nghal theih. Result hi nghah deuh a ngai a, darkar 4 vel tal nghah a ngai niin an sawi.

TRUENAT: Hei hi PCR tluk dawn thawa tha, Mini PCR an tih mai a ni a. Viral load a hriat theih. A result hi darkar 1-2 chhungin a chhuak.

RAPID ANTIGEN TEST: Hei hi tun laia kan hriat lar tak ber hi a ni a. Khawi hmunah pawh a kalpui theih a. A test man hi Rs 450 vel a ni. Viral hrik pai tam (High viral load)-ah chuan PCR-te nen a sensitivity hi a inang deuh reng (Weitzel et al 2020, Chile). Hrik pai tlem lamah PCR a tluk loh avangin PCR-a ennawn ngaih chang a awm thin. A result hi darkar chanve-ah a hriat theih. Khing kan tarlan tak atang khian eng khawl mah Covid-19 vei 100%-a hmuh theihna khawl a la awm lo tih kan hre thei ang. A khawlin a hmuh loh, hrik pai tlem zingah an awm zeuh zeuh thei tih hi hriat reng a tha.

RAPID ANTIBODY TEST: Hei hi natna lo vei tawh thinte screening tih nan hman tangkai thin a ni. A vei tir zawnna atan an hmang lo tlangpui. Chuvangin, test-na zawng zawng aia mi tin tana tangkai tur chu ‘FIMKHURNA’ bawk hi a nih avangin a thunawnah hmang leh teh ang.

MI TIN TIH TUR
Kum upa leh natna benvawn neihote hi hmun tinah a tuar nasa ber an ni zel a. Damdawi in leh ICU mamawhtute pawh an ni ber thin. Nunna chân tam ber pawh hengho hi an ni a. Chuvangin, anniho venhim hi kan zavai mawhphurhna a ni. Kum upa takho chu inah an awm mai thei a. Natna benvawn nei tam tak hnathawh ngai site zawm tur leh kan vaia zawm tur i han tarlang leh teh ang.

1. MASK: Hei hi mi tinin hman tur. Natna benvawn nei chuan englai pawhin hnathawhnaah mask vuah tur. A theih chuan surgical mask hi ni tin thlak a tha. Pakhat Rs 10-20 man vel a ni. Kuhva/ melzial man tluk pawh a ni lo. A suk theih chi chu ni tin suk zel a him ang. Mask vuah lo chu tumah biak loh ngam a tha. Tumah chibai loh leh biak tam loh a him ber.

2. SOCIAL DISTANCING: Natna benvawn vei leh kum upa tawhte chuan mi an biakin hlam khat dan (6 feet) tal ni thei se a tha. Minute nga aia rei inbiak hian hri kai theihna a sang tih hriat reng tur a ni. Inchhung/room-a mi dangte nen awm an nih chuan a thawveng thei ang bera room chu hawn tur a ni. Hetiang tih theih lohnaah chuan kal loh hram tum tur. Mahni inah pawh mi dang hlat deuha awm tum tlat tur. Thutkhawm tam deuhnaah chuan mask vuah mai a tha. Tu leh fate pawh chhawnchhaih loh mai a him. Naupang hian an kai awlsam a, an damlo ve lem lo. Chhiat ni/that niah kum upa lam leh natna bevawn neiho hi chu kan beisei loh a tha ang.

3. INVAWN FAI: Kut sil zin bakah kut sahbawna sil hmasak loh chuan hmai, kâ, hnâr leh mit khawih loh tur a ni. Hand sanitizer inchhawp reng a him. Mi dang zawng zawngin keimahni inveng chungin heng ‘vulnerable group-ho’ hi kan venpui theuh chuan kumin kum tawpah hrikai 5000 lai kan lo awm a nih pawhin kan buai lutuk lo turah ngai ang.

FRONTLINE WORKER-TE: Kan front line worker-te hi kan chawmawi an ngai khawp mai. Kan himna tura dai min theusaktute an ni. Henga thawk tam tak zingah, abikin medical lama thawktute hi kan hriat thiam an tul. A tam ber hi hna nghet lova chhung kaw chawmte an ni a. Thla tawpa hlawh lak theih loh chang pawha thawk tang tang thin an ni. An lo positive palh pawhin diriam mai lovin “naktuka ka positive ai min lo va positive-sak a ni” tih theih theuh i tum ang u. Sawrkar lam atangin a harsa a nih pawhin vanduai vanga positive palhte hi chu vantlang zinga mi inphalte hian puihnate siam thei ila, a entawntlak ngawt ang. Kan doral lian chhumpui zing a kian deuh hunah phei chuan an zavai hian kan sawrkar chak tak hian dah nghet vek se ka va tihpui tak em!

TRACKING, TRACING & TREATMENT: Tuna kan hotuten an tih dan hi chhunzawm zel thei ila. Kan sawi ang khian a hri paiah pawh hripai tam leh tam lo hi thliar tawh ila. Hripai tam (High viral load)-ho chauh hi contact tracing-a umzui nasat ngai chu an ni. Hri pai tlem phei chu umzui nasat an ngai lem lo ang. Tuna positive te leh contact tracing kan tihduhna lai ‘Containment zone’-a puan mai emaw, quarantine mai zel emaw hi kan kal dan tur a nih hmel. Kan eizawnna leh hnathawh tibuai lo thei ang bera kal hi kan tum chhoh zel a tha ber ang. Contact tracing pawh hi mipuiin pui tha bawk ila. Thil tha tak nia kan hriat, kan tlin lem loh hi chu tih loh ngam a tha mai.

A hlauhawm rualin a hlauhawm lohna lam hriat tel ve a tha. Fimkhur loh phah nan hmang chuang lo ila. August ni 21, 2020 hian India rama hri kai mi 29,04,329 an awm tawh a. Mitthi 54,975 an tling tawh. India rama vei zat atanga thi zat chhutna Case Fatality Rate (CFR) chu 1.92% chauh a ni rih. Natna kan hriat tam tak ai hian thihpui kuminah pawh an la tlem zawk. Chu chu khawvel hmundangah pawh a ni. Khawvel pum huap hripui a lo leng fo tawh a. Reh hun an nei vek. Tuna Covid hripui pawh hian reh hun a la nei ngei ang.

Chuvangin, keini pawh thu kan awih a, kan fimkhur tlan vek chuan, tuna keipui hliam huala kan hual mup mup hi nakinah chuan PATHIAN zarah a la reh duak ngei ang. Fimkhur takin thu awihin i tangrual zel ang u.