DOWNLOAD OUR APP

Read latest news on your phone
play-store app-store
app-store
Covid-19 enkawl ang u le!
titi ZALEN
Sep 06, 2020
ad
  • Dr. Lalbiak Kima
  • Kan duh vang pawh ni hauh lovin Covid hripui chuan min rawn luhchilh tan a ni ta ber mai. Khawvel ram tin a fang chhuak a tih theih tawh awm e. Engtin nge kan lo inven zel ang tih leh a hrik kai leh vei te laka kan fimkhur zel dan tur leh a tul huna enkawl dan tur kawng hrang hrang tar lan tun tumah hian kan tum dawn a ni. A enkawl danah phei chuan an la âr khawthim dai tlang deuhin khawvel mi thiamte pawhin a tihdamna tak an la hmu lo va, an la inzir thar zel tih hriat a pawimawh hle bawk ang. Vawiina dik nia hriat hi a hnuah a lo dik vek lo thei bawk.
  • CORONAVIRUS KAN TAKSA A LUH DAN: Kan sawi fo angin heng natna hrikte hi kan kâ, hnâr leh mit atanga lut thei chauh an ni tih kan hria a. Mihring taksa chhung ril timur (cell)chhunga lut zel tur hian luh theina bik an nei a. Chu an luh theihna bik chu Angiotensin converting enzyme 2 (ACE2) a ni. Heng hi natna hrik virus lo luhna kawngkhar (receptors) an tih chu an ni.
  • NATNA BENVAWN VEI LEH ACE 2 RECEPTORS: Mi thiamten kum 2000 vela ACE2 hi an hmuhchhuah a ni a. Mihring timûr (cell) tuamtu kâwrah hian an awm ve a. An hnathawh chu taksa hliam tur vên leh siam that (repair) te, BP tisâng thei tur enzyme dang hnathawh a tawk chauha lo ven (RAAS PATHWAYS) etc te an ni. Heng mihring cell vêngtute hi hnâr kawchhûng, ka chhûng, mit (conjunctiva) leh a bîkin chuap chhûng timûr (alveoli)-ah hian an tam êm êm a. Heng bakah lungphu, kal, rîl, thisen zâm leh thluakah te an awm bawk. Heng mihring cell vawng himtu turte hi Covid hrik hian luh nân an rawn hmang ta hlauh a ni. Kawngkhar a lo tam poh leh an lut tamin, an tichhe nasa dawn a ni. Coronavirus hian a kâwr zum fir fer (spike proteins) hi heng receptor ah hian a rawn vit bur chat a. Chumi hnuah a rîl ang tak RNA chauh hi a luhtir a, a kâwr zawng hi chu pawnah a hnutchhiah thin. Tichuan, mihring cell chhunga ei tur leh thil dang lo awmsa kha ringin a insiam pung ta vak a. An awmna kha tâwn kehin cell dang an vaihma chho ta thin a ni. Mihring taksa dang vunah te hi chuan ACE2 receptors an awm ve loh avangin an lut thei lo. Kan kutah lo kai teuh pawh ni se, kan kâ, hnâr vela kan han dah kher loh chuan an mahniin an kal sawn thei lo. Chuvangin, sahbawn/sanitizer a tlen fai duak duak fo tur a ni.
  • Mihringah hian ACE2 receptors hi a tam dan a inang vek lo a. Hetiang nei tamho an sawi chu natna benvawn nei, entir nan:
    Chuap natna nei (asthma, COPD etc), Lungphu natna (Cardiac Diseases), thisen sang, kal natna, Zunthlum nasa (Diabetes) thluak lam tha lo (Strokes) thin lam natna, Cancer vei, HIV hrik pai etc etc. Taksa repair hnathawk an nih avangin taksa repair ngaih tamna hmun apiangah hian an tam bik ni pawhin an hria.
    Heng bakah hian meizu nasa (Heavy smoker)-ho hian 30-55% velin ACE2 receptors hi an nei tam thin. Chuvangin, mei zu nasaho zingah Covid natna hi a na bîk hle thin (Joan C.Smith et al. Devlop. Cell 2020).
    Vaihlo atanga siam tho sahdah, tuibur hmuam nasaho hi zirchiang ve ta se, mei zu nasaho nen an inang ve mai thei ang em? Fimkhur a ngai e.
  • KUM UPA HOTE: Kum upa lamah chuan kan sawi tak, ACE2 receptors khi an tlem zawk mah nain Covid 19 hi an tuar na hle tho mai. A chhan pakhat chu kum upaho hi natna hrang hrang nei an lo nih fo thin vang a ni. Chutih rualin kum upa tak pawh mahni invawng tha leh hrisel takho chu mi dang ang bawkin Covid hripui hi an tuar chhuak ve tho mai. Heng bakah hian kum upaah chuan taksa sipai ‘antibody’ siamtu ber, ‘Lymphoid tissue’ hi a lo tlem tawh a. Heng vang hian an taksa danga râldo theitu (immune system) zawng zawng an rawn insawr khawm ta vak a. Chu immune thlipui chu ‘cytokine storm’ an tih, tam takin an thihpui tak si hi a ni. Mahni in chhunga sazu ûm chhuah nan intichhe vek thei laipuia kah ang vel hi a ni mai awm e. Kan la hriat thiam vek loh tam tak chu a la awm a ni.
  • TUTE NGE KÂI AWL BIK?: Tam tak chuan kum upa leh natna benvawn nei (comorbidity)-ho hi kâi awl bik turin an ngai a ni mai thei. Mahse, hengho hian an kâi awl bik chuang lo. Naupang lam leh thalai pawhin an kai awl zawk mah thei a. Fimkhur lo apiang hi hri kâi awl chu an ni mai.
  • ENKAWLNA LAM: Kan hiat theuh angin Covid-19 positive (kai) 80% aia tam hi chuan eng enkawlna mah an ngai hran lo. Anmahniin an dam leh mai. A kai zinga 15% vel hian damdawi in awm an ngai thei a. Chung zinga 5% vel na zual bikin ICU leh ventilator pawh an mamawh thei. Kan sawi tawh ang khan a damna tur tak hriat la ni lo mah se, doctor-ten an damdawi hman lar deuh hming chauh han tar lang ila:
  • 1.AZITHROMYCIN leh HYDROXYCHLOROQUINE:
    Heng hi a tir lam khan an han hmang viau nain tunah chuan an hmang zui ta lo. Malaria damdawia hman thin, Hydroxychloroquine hi chuan virus tihlum thei lo mah se, an luhna kawngka, ACE 2 receptors kha a lo block theih avangin tun thleng hian invenna atan la hman a ni.
  1. REMDESIVIR:
    Hei hi chuan cell chhunga virus inthlahpung (RNA polymerization) tur kha a veng a. Damlo serious oxygen ngai nasahoah enchhinna ang deuhin an hmang mek a. A tira an fak ang êm ni lo mah se, an dam hma phah niin an hria.
  2. TOCILIZUMAB:
    Hei pawh hi damlo na zual, thih mai hlauhawm, ‘cytokine storm’ neite tan an hmang.
  3. Convalescent Plasma:
    Covid vei dam leh te thisen (plasma) bik kha Covid vei serious-ho an pe thin. Hei hi hmun thenkhatah chuan tha viauin an hria.
  4. STEROID: (Dexamethasone etc) hi natna a lan tirha pek chuan tamtak thihpui ‘Cytokine storm’ pawh a pumpelh thei a. Mi dang pawhin an thatpui viauin an hria. Hydroxychloroquine ei thei loho hi Doxycycline leh Ivermectin te an pe thin a. Mahse, hmun tam takah chuan an pe tawh lo. Khingho khi a serious zual ho an pek thin te chu a ni. Heng bâka a serious zual ICU awm ngaite leh ventilator vuah ngaiho chu doctor thiam, ICU-a thawk thin ‘Intensivist’ ten damlo dang serious enkawl ang thoin an enkawl leh mai thin a ni. Hetiang doctor thiam bik eng emaw zat Mizo doctor zingah hian an awm a. A thlamuan thlak hle a ni. Covid positive symptom nei lo chu Vitamin C, D leh Zinc tablet te an pe bawk. Khing kan sawi tak atang khian hri kâi, symptom nei lo leh an sample test atanga hrik pai tam lote, anmahni inah mi dang kai darh lova enkawl dam theih an ni. Hei hi hmun tam taka an tih mek leh kan thenawm Manipur leh Tripura pawhin an tihtan tawh a ni. Kan tih ve theih chuan a that hle a rinawm. TUTE NGE IN LAMA ENKAWL THEIHTE CHU?: Heng enkawl dan guideline chu India sawrkar health ministry hian a siam vek a. State tam takin an state milin an nei bawk a. Hriat belh duh chuan health-a thawktute an zawh theih ang. Kan hriatna tizautu atân, a tlangpui chauh lo tilang ila. Doctor-ten an enfiah hnuah kalpui tura ngaih a ni.
    1. Covid positive,symptom nei lem lo (Asymptomatic cases).
      2.Mahni ina indah hranna nei. Duhthusam chuan room hrang nise.
    2. A enkawltu bik (Care taker) chhungkaw zinga mi ngei awm thei se.
    3. Mahnia inenkawl (self monitor) thei. Manipur-ah chuan Pulse Oximeter an pe nghal a. Hei hi thisena oxygen awm zat hriatna a ni a. Kutzung?anga cheh beh mai a ni. Thil man to a ni lo. Mi pangngaiah chuan Spo2 hi 95-100% a ni.
      ENG HUNAH NGE DOCTOR AN HRILH ANG?:
    4. Thawhah an neih veleh.
    5. Spo2 hi 95% aia a lo hniamin. Natna dang nen Spo2 hi khaikhin loh tur.
      3.Anmahniah danglamna tawng fiah lo emaw âwm chhungna etc an neihin.
      4.Rilru buai/kaih an lo neihin.
      CHENPUITE FIMKHUR DAN TUR:
    6. Damlo hman tur engkim a hrang hlak tur a ni. Chaw leh ei tur a hranga pek tur.
    7. Covid +ve khan englai pawhin mask vuah rengin, darkar 8 hnuah a thlak zel se a tha. Heng a thil hman hnu hi disinfect zel tur. Inthiar tur a kal dawn leh a hnuah kut sahbawnin silfai zel tur. A buaipuitu hian glove paih mai theih a hmang bawk ang. Feet ruk vel a hlaah a awm tur a ni. Damlo leh enkawltu hian Hand Sanitizer/sahbawnin 40 seconds tal kut an sil tur a ni. A thawmhnaw bal disinfecta suksak zel tur.
      3.A chenpui dangte pawh fimkhur hle tur. Damlo hnaiah awm loh tur. Naupang leh kum upa fimkhur zual a tha. Kut hi sahbawnin second 40 tal sil thin tur.
    8. A chenpui zawng zawngten inven nan Hydroxychloroquine, Doctor ruahmanna angin an ei vek tur a ni.
      ENGCHEN KHUNG HRAN TUR NGE?
      Natna (symptom) a lan chhuah atanga ni 10 chhung, ni thum tal khawsik a nei lo tur a ni. Ni 10 hnu hi chuan mahni in veng pahin ni sarih (7) dang pawn chhuak lovin inah a awm zuiin a inngaichang ang. Hemi chhunga engmah inawiselna a neih loh chuan sample pawh test a ngai tawh lo. A dam tawha ngaih tur a ni. Hei hi sawrkar laipuiin kaihhruaina a siam state tam takin an zawm chu a ni a. Mahni state duh dânin a siam danglam theih leh theih loh chu ka hre lo a.
      Khitianga enkawl theih hi Covid kai zinga a tam ber an ni thin.
      Thenkhat chuan hetiang a chhuah zalen mai hi an hlauthawng mai thei. Mahse, a zirmi (Virologist)-te leh mi thiam epidiomologist-ho chhût dan chuan, a tirte atang khan kan sample test (sample test based)-in kan kal a. A test-na hi 100% accuracy a awm rih lo va. A test positive kan buaipui tam ber hi enkawl ngai lo an ni si a. Chuvangin, a natna lan chhuah dan (symptom based)-a kalpui mai hi him tawkin an hria a ni. Ram dang USA, UK angah pawh a tam thei ang ber an test a. Tumah khung hrang lovin Helpline number pein an hawtir vek a. Harsatna nei ho khan an rawn hriattir a, chungho chu an buaipui mai thin a ni. Keini pawh mi dang tih danin sample testing hi a tam thei ang Mizorama chengte sawrkarin test zel sela, a kai leh kai lo hriat nan. Kan hriat angin natna an kai atanga ni 4/5 velah a natna (symptom) a lo lang a. Hemi atanga chhiar a ni 10 thleng bak hi natna an thehdarh tawh lo. A hnua test leh hi a tul lo an rawn ti a ni mai. He mi hrechung hian kan sawrkar laipui mithiam rualten kalphung an rawn thlak a ni ngei ang. Testing ringawt a innghah ai chuan FIMKHURNA hi pawimawh zawk an rawn tihna a ngaih tur a ni ang. Tute emaw test a negative a, inthlahdul mai hi thil awm theih tak a ni reng a . Khawvel a hrikai tamna ber chu USA niin, a thi zât chhutna Mortality rate chu 3.3 % chauh a ni. August 3, 2020 khan India nikhat hri kai tam record 83,883 a thleng a. Hri kai zawng zawng 38,53,406 an tling tawh. Mitthi 67,376 an awm tawh bawk. Heti chung hian kan Mortality rate chu 2% vel a ni chauh awm e. Fimkhur zual sauh a ngaih rualin kan pawng hluh lutuk loh a tha. Keimahni pawh han inen ila, a thaw a tawp mai dawn ni awm taka ambulance siren ri nen kan tlan pheipui hi khua pawh va sik chhin lo a, hun va hmang zo, rawn chhuak leh ta hi an ni mai thei a. A tul lem lova râlkhel hi thil awm thei tak a ni.
      Tichuan, kan ramah pawh Covid hrik pai damlohna (symptom) nei nasaho chauh kha khung hran leh damdawi in lama enkawl ngai an lo ni ang. Hengho hi chu a hri kai zinga 15% emaw chauh an lo ni tawh ang. Kan sum leh pai (resources) neih ang ang chu hengho enkawl nan hian a tha thei ang berin kan inruahman chho thei tawh dawn a ni. Vawiin ni thleng hian Mizoram chu maktak maia min siamtu Pathian vennain nunna chân kan la awm lo hi a lawmawm hle a ni.
      Fimkhurin, thuawihin tang tlang zel ila. He hripui hi Mizoram chuan Pathian zarah kan la hneh ngei ang.

Latest News & Chhiar Hlawh