Aizawl: Zirtawp zan khan Covid-19 enfiahna hmun hrang hrang atangin Mizoramah Covid-19 hri kai mi 26 hmuh thar an ni a, heti hian Mizoramah Covid-19 hri kai 1,379 an awm tawh a ni.

September 11, 2020 khan ZMC RT-PCR laboratory-ah sample 1,111 enfiah a ni a, COVID-19 hri kai 18 hmuh chhuah a ni a. District hrang hrang TrueNAT laboratory-ah COVID-19 hri kai 8 hmuh chhuah a ni bawk a. Rapid Antigen Test hmangin COVID-19 hri kai hmuh chhuah an awm lo thung.

ZMC Laboratory-a hri kai hmuh chhuah tharte hi an vaiin Venghnuai, Aizawl-a cheng vek an ni a, civil mi vek niin, mipa 15, hmeichhia 3 an ni. An zingah hian nausen hmeichhia thla 9-a upa a tel a, mi dang zawng hi kum 26-54 inkar niin an zavai hian hri kai hnaihchilh (positive contact) atanga kai an ni a, in lama inkhung hrang lai vek an ni.

District hrang hrang TrueNAT Laboratory-a COVID-19 hrikai hmuh chhuah an awm bawk a. Siaha district-ah 1, mipa kum 53-a upa, Assam atanga lo kal, inkhung hranna hmun a awm lai, taksa a natna lang lo a ni.

Lawngtlai district-ah 2, mipa ve ve, kum 23 leh 24 inkar, Assam atanga lo kal niin September ni 6, 2020-ah Lawngtlai an thleng a, cement mistiri niin inkhunghranna hmuna an awm mek, taksa a natna lang chhuak lo an ni. Saitual district ah 5, mipa vek, kum 19-40 inkar, NIDHI construction hnathawk, September 5, 2020-ah Assam atangin Saitual an thleng a, BRC inkhunghranna hmun, Saitualah khung hran nghal niin, taksaa natna lang chhuak lo vek an ni.

Tun dinhmunah Mizoramah Covid-19 hri kai 1379 an awm tawh a, heng zinga 1145 hi mipa niin 234 chu hmeichhia an ni a, hri kai zinga mi 823 chu enkawlna hmun atangin damin an chhuak tawh a, tun dinhmunah enkawl lai mek 556 an la awm a. District hrang hrang dinhmun chu Aizawlah vei mek 442, dam tawh 463, Lungleiah vei mek 9 dam tawh 115, Siahaah vei mek 8, dam tawh 27, Champhaiah vei mek 2 sam tawh 15, Kolasib ah vei mek 103, dam tawh 100, Serchhipah vei mek 6, dam tawh 13, Lawngtlaiah vei mek 4, dam tawh 29, Mamitah vei mek 12, dam tawh 21, Khawzawlah vei mek an awm lo, dam tawh 3, Hnahthialah vei mek 2 awmin dam an la awm lo, Saitualah vei mek awm lovin dam tawh 4 an awm.