India chuan sikul a hawn hnu rei vak lovah coronavirus vaccine chu naupang kum 12 leh 14 inkarte tan a pe tan ta.

Naupangte hian Corbevax damdawi in an dawng hlawm a, hei hi India-in a ram chhunga invenna a siam pathumna a ni.

India hian Nilaini atang vek hian booster dose la thei, kum 60 chung lam, natna benvawn nei chauh a tih pawh huang zauhvin kum 60 chin tawh phawt chuan an la thei.

Prime Minister Narendra Modi chuan  invenna pek huang an zauh chungchang chu Twitter-ah tar langin Nilainia bul tan chu India-in a khua leh tuite invenna pe ve tura ni pawimawh a nih thu a tar lang.

India-ah hian January, 2021 atanga invenna a pek tan hnuah vaccine dose vaibelchhe 1.8 chuang a pe tawh.

Puitling zinga 90% chuang chuan dose hnihn an dawng tawh a, 99% chu dose khat tal dawng tawh an ni hlawm.

Kumin January atang khan booster dose hi damdawi ina thawk leh hri leng beihnaa a hmatawnga tang dangte hnenah a pe tan a, a hnuah kum 60 chin, natna benvawn neite a pe zui leh.

Hemi hnu hian damdawi ina thawk leh hri leng beihnaa hmatawnga tang mi maktaduai 10 chuangin an la leh tawh a. Kum 60 chung lam maktaduai 10 chuangin an la leh tawh bawk.

January thla khan kum 15 leh 18 inkarte hnenah invenna hi pek tan a ni bawk a. An zinga 75% chuangin dose khatna an dawng tawh.

India hi hripui tuar na ber zinga mi niin mi maktaduai 43 dawnin kai tawhin United States dawta an tam berna a ni a. Mi 5,15,000 chuang thi awm tawhin US leh Brazil dawt a ni.

Tunah hian ni khata hri kai hmuh chhuah chu mi 3,000 bawr vel an ni a. January thla khan Omicron variant chu nasa taka inkai darhin tunah an dinhmun a ziaawm leh tawh a ni.