Aizawl : Nimin khan Chief secretary's Conference Hall, MINECO ah Mizoram COVID-19 dinhmun thlirho neih a ni a, Health & Family Welfare Minister Dr. R. Lalthangliana chuan a kaihruai a, Covid vanga nunna chan an awm loh nan theihtawp an chhuah reng thu Health Minister chuan a sawi.

He hun kaihruaitu Health Minister Dr. R. Lalthangliana chuan Aizawl tih loh district 10 ah Truelab Quattro Real Time Quantitative micro PCR bun fel a nih tawh thu a sawi a, a tam zawk hi chu kar thar tir lamah hman tan theih a nih a beiseiawm thu a sawi. Khawl pakhatin nikhatah sample 100-200 a test theih tawh dawn avangin kan tangkaipui hle dawn a ni, a ti. Kan thawhrim tlanna rah hi sawrkar laipui hotute pawhin an rawn hmuthiam a, fak pawh kan hlawh a, COVID-19 vanga nunna chan kan awmloh nan theihtawp kan chhuah reng dawn a ni, a ti bawk.

COVID-19 dona kawnga thawktu indaihlohna phuhru turin hmalak zel a nih thu a sawi a. COVID-19 hri kai enkawlna tur CCC indaihlohna a nasat thu sawiin positive an pun thut thut hian a manganthlak thin a, Sawrkar laipuiin kumin kum tawpah mi 5000 chuang hri kai tawh turin min chhut sak a, heng harsatna lo hmachhawn tur hian a theih ang angin kan inpuahchah zel a, natna hriatthiam harsa tak mai, an la zirchian mek a nih avangin rorel thiam a har em em a, mipuite thlawpna kan mamawh em em a ni, a ti.

Thlirhona hunah hian COVID-19 veite enkawlna hmun tur Covid Care Centre (CCC) leh Dedicated COVID Health Centre (DCHC) indaih lohna phuhru tura hmalak a nih thu sawi lan a ni a, hmalam hun thlirin a tlem berah a ruala mi 2500 enkawl theihna tur CCC leh DCHC mamawh a nih thu tarlan niin CCC atana hman mek indaihlohna phuhru tura ruahmanna siam zingah khawtlang lamin rem an tih loh vanga hman remchang lehlo a awm thin avanga buaina a awm thu te, district tinah CCC atana hman tura hual lawk sa a awm tawh thu leh hengte hi harsatna awm lova hman theih a nih vek chuan mi 2000 bawr vel enkawl theih a nih beisei thu sawi a ni.

Positive awma an sulhnu chhuitu pawl "contact tracing team" hotute pawhin an hmalaknate tarlangin Local task force te nen an thawhhona a that avanga hnuchhui a awlsam thu an sawi a. Contact tracing tihna ah harsatna lian zawk a thlen loh nan positive te leh an contact ten engmah zep neilo thin se an duh thu an sawi.

Sample collection team te hmalakna pawh ngaihthlak niin, chak lehzuala hna an thawh theihna tura hmalak ngaite sawiho a ni bawk. Sample lak hun tur chungchangah Local Task Force leh Contact Tracing team nen ruahmanna siamho a nih thin thu an sawi a, Local Task Force te thu leh hla ngaichang thin turin sample laksak turte an ngen a ni.

COVID-19 veite CCC atanga chhuahtir dan tur chungchang sawilan niin ICMR in inkaihhruaina dan a siam thar ber zulzuiin Mizorama hman tur inkaihhruaina dan siam vat tum a nih thu sawi a ni a. Mipuite zawm tur inkaihhruaina hrang hrang sawrkarin a ruahman mask vuah, social distancing, zan curfew te chu tun aia khauh lehzuala kengkawh tura tan lak tha tha an tih thu an sawi bawk.

Thlirhona hunah hian Health & Family Welfare Board Vice-Chairman Dr. ZR Thiamsanga, MLA, Chief Secretary Lalnunmawia Chuaungo bakah Health secretary, Home Secretary, IGP (L&O) leh CIVID-19 dona kawnga hmalatu team hrang hrang aiawhte an tel.