Aizawl: Nizan hmasa dar 10:40 khan C.Lalthanga (70) b/o C. Lalduhthlana, Dinthar chu Covid 19 vangin ZMC-ah a thi a, nimin chawhma dar 10 khan vui a ni.

Thudawn danin Lalthanga hi October 28, 2020 khan Covid-19 a kai tih Rapid Antigen test hmanga hriat chhuah a ni a, Zoram Medical College, Falkawnah enkawl niin a dinhmun hi tha lo chho zelin nizan hmasa khan a boral ta a ni.

A chhungte hi a then quarantine centre-ah an awm a, a then home quarantine an nih bawk avangin a ruang hi ZMC atangin thlanmual panpui nghal a ni. Dinthar vengah hian Covid positive an tam avangin containment area-ah puan mek a ni.

Covid-19 vanga thi an awm leh tak avangin Mizoram chhungah he natna avanga thi mi 3 an awm ta a. October 28, 2020 khan Lalsangkhuma (62) Dawrpui veng chu Covid-19 vangin a thi a. November 5, 2020 zing dar 1:30 khan Darhawni (78), Durtlang Leitan chu ZMC-ah hian a boral bawk.