Aizawl: Mizorama Covid 19 positive case hmuhchhuah tawh zawng zawng zat chu 413 an ni a, heng zinga 230 (55.69%) chu civil mi niin Forces (BSF/AR/NDRF etc.) - 183 (44.30%) leh mikhual (migrated) 1 an ni. Tun dinhmunah Mizoram ah Covid-19 vei mek 166 awmin heng te hi Forces -120 (72.28%) leh Civilians - 46 (27.71%) te niin Covid-19 positive enkawl dam tawh zat chu 247 a ni.

Zirtawpni khan ZMC RT-PCR laboratory-ah swab sample 134 test niin Covid-19 positive thar 3 hmuhbelh a ni a. Serchhip district ah Rapid Antigen Test hmangin COVID-19 positive 1 hmuhchhuah a ni a, Lunglei Civil Hospital a TrueNAT laboratory-ah sample 36 test niin positive 1 hmuhchhuah a ni.

ZMC RT-PCR laboratory-a sample test 134 zingah hian sample 128 a negative a. Negative zingah hian pre-positive test nawn 6 an tel a, pre-positive test nawn zinga 3 an la positive chhunzawm.

ZMC laboratory-a Covid-19 positive thar hmuhbelh te hi Aizawl district ami vek niin mipa 2 leh hmeichhia 1 an ni a. Kum 24-56 inkar a upa an ni a. Manipur, Assam leh Tripura atanga lo haw te an ni. An zingah hian civil mi 2 leh BSF 1 awmin BSF sipai hi Covid-19 symptoms nei, ZMC a admit lai a ni a, midang 2 hi symptoms neilo, Quarantine lai ve ve an ni.

Rapid Antigen Test hmanga Covid-19 vei hmuhchhuah hi mipa kum 27 a upa, Serchhip district a awm niin, Jammu & Kashmir atanga lo haw, Quarantine Facility a awmlai a ni a, Covid-19 symptoms a nei a ni.

Lunglei Civil Hospital a TrueNAT laboratory-a Covid-19 vei hmuhchhuah hi Assam atanga lo haw, hmeichhia kum 16 a upa a ni a, Covid-19 symptoms a nei lova, Quarantine Facility a awm lai a ni. Lunglei Civil Hospital TrueNAT Laboratory-a sample test zawng zawng hi 1024 a tling tawh a ni.

Nimin khan Rapid Antigen Test hmangin Lengpui Airport ah sample 3 test niin, Serchhip district ah sample 3 tho test a ni.

Kar kalta khan Covid 19 vei 52 hmuhchhuah an ni a, chhuah tir 64 an awm. Tun dinhmun-ah Mizorama quaratine centre 121 awmah quarantine mi 1953 an awm mek a ni.