Aizawl: Covid 19 vei pung zel mahse Mizoram sawrkar inbuatsaihna chu a tha tawkah an ngai a. Tuna ZMC a khawl 2 awm mek bakah 1 dang bun fel anih hunah chuan ni khatah sample 1000 en theih beisei a ni.

Zalen in a kawmna ah Health Secretary H.Lalengmawia IAS chuan Covid vei pung zel mahse sawrkar (Health Department) inbuatsaih chu a tha tawkah an ngai tih a sawi a. "Covid damlo enkawl nan hian district hrang hrangah covid care centre tur tih chian (notify) a ni tawh a, heng hmunah te hian a natna langchhuak lemlo te enkawl an ni ang a. Tlema na deuh, oxygen pek ngai te enkawl na tur Dedicated Covid Care Centre pawh notify a ni tawh bawk a. A na lehzual te chu ZMC ah enkawl tura tih a ni a, tunah hian ZMC ah ICU khum 36 a awm mek a ni," a ti. Covid vei damlo, natna lang lemlo te chu district lamah pawh an enkawl thei tih sawiin tunhnaia Kolasib atanga damlo te ZMC a an sawn chhan chu an buai vang niin a sawi a. "Kolasib hi khualzin luh leh chhuahna ber anih avangin Health department thawktu te an buai hle a, chubakah damdawiin awmna hi a khawlai deuh bawk nen ZMC lamah sawnchhoh an ni," a ti.

H.Lalengmawia chuan tun dinhmunah ZMC chuan Covid enna khawl 2 hnathawh tir mekin mi thahnemngai te pek hmanga lei chu kawng lakah a thang mek tih kan palai a hrilh a. "Khawl 3 tluang taka hna a thawh a, RNA extractor nen tum anga hna an thawh theih chuan ni khatah sample 1000 kan test theih kan beisei a. Kan tum anga thil a kal chuan thla leh tawp lamah chuan a duh apiang kan test theih hial kan beisei a ni," a ti. "Quarantine Centre a awm te result hi a vaiin test vek kan tum a, result hre lova chhuah tir loh kan tum a ni," tiin tuna khawl bakah sawrkar chuan a tul anga RT-PCR khawl chu leibelh zel a tum niin a sawi bawk. Health Secretary chuan thawktu lam pawh an inbuatsaih nasa nia sawiin, "Sample la tur pawh kan insiam belh a, sample hi lak zung zung a, test zung zung kan tum a. Tunah hian khawl enkawl turin Doctor 2 leh Teachnicaian 2 chu Silchar Medical College ah kan tir mek a. Test kit ah pawh buai lo turah kan in ngai a, a tul angin ICMR in min pe zel a ni," a ti bawk.

RAT chu a vei te zawn chhuahna (surveillance) atan hman a ni tih sawiin, "Rapid Antibody Kit (RAT) hi hman tantirh atangin natna hmuhchhuah (diagnose) nan hman a ni lo a. Mithiamte chhut dan chuan miin Covid a kai atanga ni 7 chhungin a natna hi langchhuak tura ngaih a ni a, anti body a lo insiam chuan RAT hian a hmu (detect) tura ngaih a ni a. Health leh Police te pawh an vei leh vei loh zawnchhuahna atan RAT test hi hman tum a ni," tiin Zalen a hrilh bawk.