Aizawl : Mizorama Covid 19 vanga natna kai enkawlna bik tura sawrkarin a ruahman, Zoram Medical College (ZMC) chuan he natna kai enkawlna atan thuam an hak thin Personal Protective Equipment (PPE) kit tha 3,000 vel a nei a, Covid 19 enkawl nan PPE nitin 50/60 hman a ngai a, tunah hian PPE set hmantlak 2500 bawr vel ZMC chuan kawlin tun dinhmunah Mizoram chuan Covid-19 vei leh vei lo enna 'test kit' 500 vel a nei mek.

ZALEN thudawn danin damlo enkawlna atan hian ni khatah PPE kit set famkim hi a lo berah 50 a ngai a, 60 hman chang a awm fo a. Damlo a zirin ni 28 vel enkawl ngai niin damlo pakhatah PPE 1400 tal hman a ngai tihna a ni a. Hetih lai hian damlo hi 1 aia an tam anih pawhin ward chhunga damlo awm zawng enkawl nana PPE a hek lam chu damlo 1 a hman nen a danglam tehchiam lo niin kan thulakna chuan a sawi bawk.

Health and Family Welfare Board Vice Chairmah Dr. ZR Thiamsanga, MLA chuan Sawrkar hian tualchhungah PPE gown/suit hi a thui tir mek a, phai lam atanga chah erawh an nei rih lo a, PPE lei leh hunah chuan a siamtu (manufacture) atanga lei a nih tawh tur thu a sawi a. "Phai lam atanga PPE kan chah lai hian duh thlan theih a ni lo a, a awm ang ang inchuh a ngaih avangin kan duhthu a sam lo a. Mahse tlem siamtha in a hman theih a ni a, PPE kit duhthusam te chu a chung berah hain a hnuaiah a dang 2 in an la thuah leh a. Tualchhunga an thui te hi a lo tha hle a, Mizo te hi kan kut pawh a lo themthiam viau a, medical lam thil thui tur pawh hian kan lo tha hle a ni," a ti.

Hetihlai hian PPE kit thlawhna--a a hrana phurh thlen tak quality chu a tha tawk lo a sawi a ni a, a him tawk lo ah an ngai niin thu dawnna pakhat chuan a sawi a, damlo enkawltu leh an enkawl damlo, an kai tih la chiang si lo te tan rinna nghah ngamna chi niin a hriat loh thu doctor pakhat chuan ZALEN a hrilh bawk.

Aizawl-a damdawiin pakhat chuan PPE kit sawrkarin an chah thlen an dawn ve chu, thuah loh chuan hman ngam chi pawh nia an hriat loh thu ZALEN an hrilh a, hospital pakhat pawhin sawrkar atanga an dawn PPE gown ai chuan tualchhunga an thui tir chu an rin zawk thu sawi ve bawk a, an theih ang tawkin enchhinna an nei tawh bawk.

Covid 19 kai te hi Mizoramah chuan ZMC chiah hi enkawl thei dinhmunah an ding rih a, chuvangin khawi district-ah pawh hetiang natna kaihhnawih ang chi rinhlelh an awm a nih chuan ZMC lam hian heng damlo hi an awmna hmuna kalchilh a, an enkawl tura hruai zel tur a ni. ZMC hian he natna avanga enkawlna ward-ah ICU tiamin khum 150 neiin ICU hi 15 an kawl a, he thu buatsaih lai hian Covid-19 vei 1 an enkawl.