Aizawl: Congress party chuan Covid-19 hripui kai pung zel hi mipui inthlahdah vang ang hiala health minister-in a sawi mai chu lungchhiatthlak an tih thu sawiin hri kai pun chhan chu sawrkarin a tih tur a tih loh vang niin an sawi.

MPCC Communication department thuchhuah chuan Congress party chuan Covid-19 hripui India rama a darh tan tirh atang tawh khan MNF sawrkar chu finchhuah tumin theihtawp chhuahin hma a la a, a hlauhawmzia leh theihtawp chhuah a tul a ni tiin, sawrkar puih a inhuam thu MPCC chuan a sawi a ni. Zoram mipuite kan him theihna tur atana thil tul tam tak awmte puangin BSL-3 emaw BSL-2 laboratory tal hi Mizoram sawrkar hian siam/nei sela tiin thla 7 liam ta khan MPCC chuan sawrkar a lo ngen tawh niin an sawi a.

Thla 7 zet a liam tawh chungin mumal zawk leh felfai zawka Covid-19 test-na tur hmun kan la nei ta chuang lova, TB research-na atana siam laboratory phuahchawp ang reng tak bak siam kan la nei lo a. A hmunhma chu dahtha ta ila, a enna/test-na Imphal lam atanga kan chawkluh rum rum te, Vety College-in an hmanlai sawrkarin a hawhsak leh mimal thahnemngaiin a pek RTPCR kan la hmang a, heti khawpa indaih lo chung siin CLP leader Zodintluanga'n MLA fund hmanga a lei lah hman chu sawi loh a hawn pawh an la hawng duh lo niin an sawi.

MPCC thuchhuah chuan BSL-2 emaw BSL-3 laboratory India ram district tina a awm theihna turin ICMR pawhin a dan siamte pawh a elhkul nasa tawh a, chuti chung chuan Mizoram sawrkar hian hmalakna ala nei chuang lo niin an sawi a. Keini aia state changkang lo zawka kan ngaih Nagaland chuan a tulzia hriain May 20 khan an chief minister Neiphiu Rio chuan BSL-3 (bio safety level laboratory) an din thar chu Naga Hospital Authority, Kohima-ah a hawng fel der tawh a, Assam state chu state changtlung an ni a, intehkhin lo ila, kan thenawm Tripura pawhin BSL-3 lab siam turin tender an ko rup tawh bawk a, a test-na tur hmunhma felfai nei tura kan sawrkar hmalakna hi a beitham hle a ni, an ti a.

March thla tir lam khan India rama BSL-2/3 lab, Covid-19 test theihna atana ICMR-in a pawm zat chu lab 52 lek a ni tiin, state hrang hrangin theihtawp chhuahin hma an la a, August thla tawp lama chhiar danin laboratory 1,321 zet a awm tawh a, vanduaithlak takin state hrang hrang theihtawpa hma la zingah hian Mizoram kan tel ve lo niin an sawi a. Hmalakna fel lo tam tak dang a awm, sawi sen a ni lo. Heti chung hian tunhnaia Covid-19 case han pung deuh chungchangah kan health minister chuan mipui inthlahdah vang ang hiala ala sawi zel mai hi Zoram mipui zahlohnaah kan ngai a, he a tawngkam avang hian Zoram mipui hnenah ngaihdam dil turin kan phut tlat a ni, an ti bawk.