Aizawl: Nimin zing Covid-19 hri vei thar hmuh chhuah 18 zinga 14 chu local level task force member zinga mi an ni.

Nimin zinga Covid vei hmuh chhuah thar 18 hi Aizawl Venghnuaia chengte an ni a, an zinga 14 hi task force member-te niin Dawng Dawng catering thawktute hnen atanga kai nia rin an ni. Zalen-in Venghnuai task force secretary V. Malrosanga hnen atanga thu a dawn danin ITI venga covid care centre-a ei leh in petu, Dawng Dawng catering hian Local Council inthlan ni (September 4, 2020) khan zing leh tlaiah ei tur an pe a, chaw petute hian hri an kai avangin heta tanga kaichhawng an nih an rin thu a sawi.

Malrosanga sawi danin an veng chu Magistrate remtihnain containment zone-ah puan an tum tih a sawi a, hri veite enkawl nan Presbyterian kohhran hall chu covid care centre atan hman an tum niin a sawi bawk.

Venghnuaiah hian LC inthlan neih tlai a nih avangin task force hna hi YMA chuan an keng hrih a, remchang hmasaah charge inhlan an tum.