Aizawl: Nimin khan Lunglei Civil hospital ah TrueNat khawl hmangin sample 7 test a ni a, an zinga 2 chu an positive tih hmuhchhuah a ni a. Positive thar te hi BSF sipai, Lunglei a awm, Kerela atanga lokir an ni a, kum 50 leh 53 an niin quarantine lai ve ve an ni.

Hetih lai hian ZMC Laboratory ah Covid 19 vei thar hmuh thar an awm lo a, nimin khan mi 250 te sample endik a ni a, he thu buatsaih lai thleng hian result hriat a la ni lo.

Zirtawpni khan ZMC Laboratory ah sample 115 test niin a vaiin a negative vek a, an zinga sample 68 hi Lengpui Airport a sample lak a ni. Mizoram dinhmun chu - Covid-19 positive hmuh tawh zawng zawng 162, dam tawh 127, la enkawl mek 35 a la ni ta a ni. Hnahthial District chu kai la awm lohna District a la ni zel bawk a ni. Nimin khan ZMC, Aizawl West, Lawngtlai, Siaha leh Mamit atangin sample 250 endik a ni a, tukin zing lamah result tihchhuah hman beisei a ni.

Tunah hian ZMC ah Covid 19 vei damlo 7 enkawl mek an ni a, heng mite hi Aizawl mi vek niin kum 3 atanga 55 inkar an ni a, an zavai hian harsatna em em an nei lo nia thudawn a ni.