Aizawl: Mizoram sawrkar chuan Zoram Medical College bakah Aizawl leh Lunglei Civil Hospital leh district tina damdawiin te chu tunhnai khan Covid 19 sample collection centre atan a siam/puang a, ti hian Covid sample enna hi ZMC bakah 11 a awm ta a ni. Civil Hospital, Aizawl a Covid sample lak hi a him lo nia hria in damdawiin thuneitu ten thuneitu sang hnenah an thlen tawh.

Zalen zawhna chhangin senior Doctor 1 chuan Zoram Medical College chu Covid 19 enkawlna tur liau liaua sawrkarin a ruahman a nih thu sawiin Civil Hospital Aizawl chu damdawi in lun leh tlawhtu tamna a ni bawk tih a sawi a. Hei vang hian ZMC ah zel hian he natna vei leh inringhlel te chu kalpuia enkawl nise a duh thu a sawi a. "Civil Hospital, Aizawl hi mitin pan a ni a, sample collection centre atana an dah hi a him lo tak zet a. Civil Hopsital ah te hian Covid vei hmu palh ta se thawktu te leh ward engemaw zat chu lockdown a ngai ngei dawn a, a tuartu tur chu mipui kan ni," a ti a. Civil Hospital chu Covid free nise a duh ber tih a sawi bawk.

Zalen palai thudawn danin Civil Hospital-ah hian Covid vei damlo lokal palh ta se midang tan a hlauhawm theih avang leh inkaidarh hluai theih (community transmission) avangin damdawiin thuneitute chuan Director, Hospital & Medical Education ah tawngka in an thlen tawh a. Covid nia inringhlel te chu lokal lo se an duh th an sawi.

Tunhnaia state danga zirlai leh hnathawka lo haw te chu an awmna district damdawiin theuhah Covid 19 an vei leh vei loh endikna (sample la) turin sawrkarin a ti a. Doctor pakhat chuan, "Covid test result hi ni 2 hnu ah chauh te a hriat a, vanduai thilah state dang atanga lo haw te hian lo vei palh se damdawiin a enkawl mek damlo engemaw zat an awm bawk si nen inkaidarhna chance a tam lutuk a, kan ramah hian a darh hluai thei a ni," a ti.

Tunhnaiah sipai pakhat damlo Synod Hospital-a inentir chu Severe Acute Respiratory Infection (SARI) natna a vei nia rinhlelh a ni a, hei hi Covid nena natna lanchhuah dan a inan avangin ZMC lamah thawn tum a ni a, mahse ZMC lamin sample la phawt tura an tih avang-in Civil Hospital, Aizawl atangin sample la turin mi an tir a. Damlo hi lo positive se, a awmna ward hi khar (close down) a ngai dawn a, thawktu engemaw zat chu khung hran (quarantine) an ngai dawn niin thudawn a ni a, mahse, damlo hi a lo negative hlauh a ni.

Mizoramah Covid 19 pung ta zel se a hlauhawm hle dawn nia sawiin Doctor pakhat chuan, "Covid kai 1 kan neih pawh heti khawp hian kan buaipui a. Kan ramah zunthlum, HIV +ve, thisen sang, lung tha lo leh natna benvawn nei kan tam si a. Kan thalaite zingah lah damdawi ti an tam bawk si a, chuvangin he natna kai lo tura tha taka inven hi a pawimawh ber a ni," a ti bawk a ni.

May 1 khan sawrkar chuan Civil Hospital Aizawl leh Lunglei bakah Champhai, Siaha, Lawngtlai, Serchhip, Mamit, Kolasib, Khawzawl, Hnahthial leh Saitual district hospital te chu Covid 19 sample collection centre atan hman tur anih thu hriattirna a chhuah a ni.