Aizawl : Covid 19 hripui leng thawh hnihna, April 1-May 20 (ni 50) chhung a hri vei hmuh chhuah te kum zat tarlan chin ah, thalai kum 15 atanga kum 44 inkar an tam ber a, hemi kum inkar a hri vei hmuh chhuah 2,289 chu positive hmuh chhuah kum zat tarlan chin atanga chhutin za a 61.84 (61.84%) a tling. 

Mizoram sawrkarin hri vei hmuh chhuah zat a tarlan thin ah hri vei te dinhmun, an chenna veng leh an kum zat etc. te tarlan thin a ni a, hetihlai hian hri vei hmuh chhuah zawng zawngte erawh an kum zat tarlan kim vek a ni lo. (Kum bithliah inkar zat ang a khaikhawm a awm thin.)

 Hri vei hmuh chhuah te kum zat tarlan chin ZALEN in a zirchianna ah thla liam ta April atanga May 20 thleng a hri vei hmuh chhuah za a 61.84 chu kum 15-44 inkar niin, kum bithliah hrang hrang zingah kum 25-34 chu hri vei hmuh chhuah tam na ber a ni.

Ni 50 chhungin kum 45 chung lam zingah Covid 19 hripui kai mi 828 awm bawkin, an zingah hian kum 97 mi pahnih an awm a, hri vei hmuh chhuah zing a upa ber an ni. 

Hri vei hmuh chhuah te kum zat tarlan chin atanga a lan danin, tunhnai ni 10 chhung velin naupang lam ah hri vei hmuh chhuah an pung zual tih a lang a, May 13-20 chhungin kum 14 leh a hnuailam zing ah hri vei hmuh chhuah mi 240 an awm a. Thla 1 mi chu hri vei hmuh chhuah zing a naupang ber a ni. 

ZALEN zawhna chhangin IDSP state nodal officer Dr. Pachuau Lalmalsawma chuan thalai zing ah hri kai an tam ang a lang chu test an tam vang a nih pakhat thu a sawi.

Kumin April thla hma lama Covid 19 positive hmuh chhuah tam ber thla chu November 2020 niin, mi 1,089 hmuh chhuah a ni a, hei hi April 2021 a hmuh chhuah zat 1,655 in a khum. Hetihlai hian tun May thla kal mek, ni 20 chhung a positive hmuh chhuah zat chu 3,609 a tling tawh.