Aizawl: Nikum 2020 chhung khan Covid 19 hripui leng vangin ram dang mi (foreiner) Mizoram rawn zin an tlem hle a, hetih lai hian tun hnai kum nga chhungin Mizoram tlawh a zin foreigner 3,699 an awm.

CID (special branch) hnuaia foreigner registration office chhinchhiah danin, nikum 2020 chhung khan foreigner Mizoram tlawha zin mi 312 an awm a, January - March-ah khualzin an awm nual laiin, Covid hri leng vanga inkharkhip a nih hnu April - December chhungin khualzin an awm mumal lo.

Kum 2019 khan foreigner Mizoram tlawh mi 963 awmin, 2018-ah mi 734 an awm a, 2017-ah mi 1,155 awmin, kum 2016-ah mi 956 an awm a. Foreigner Mizoram tlawh zingah hian an nupui/pasal chhungte tlawha zin mi eng emaw zah an awm a, America leh Britain atanga kal an tam ber.

Foreigner registration office thawktute sawi danin, Mizoram tlawh/hnathawka rawn kalten Mizoram an rawn thlen veleh an thlenna hmun atangin online self registration an ti tur a ni a, registration hi ram dang mi, visa type hrang hrang neiten tih vek tur a ni.