Aizawl: Mizoramah Covid-19 positive mi 3806 hmuhchhuah tawh an niin an zinga mi 3367 chu enkawl dam an ni tawh a, tunah hian enkawl mek mi 434 awmin, he natna thihpui mi 5 an awm tawh bawk a, Covid vei tihdam zat (recovery rate) hi 88.46% a ni.

Nimin zinga sawrkar thuchhuah tar lan danin COVID-19 positive thar 18 hmuh chhuah a ni a, ZMC RT-PCR laboratory-ah COVID-19 positive 8 hmuhchhuah a niin District hrang hrang TrueNAT laboratory-a sample test zingah COVID-19 positive hmuhchhuah thar 1 a awm a, Rapid Antigen Test hmanga positive hmuhchhuah thar 9 an awm bawk.

ZMC RT-PCR laboratory-a hmuh chhuahte hi mipa 6 leh hmeichhia 2, kum 6 - 56 inkar an ni a. Dawrpui Vengtharah 2, mipa ve ve kum 14 leh 38 an ni a. Positive contact atanga hri kai an ni a, kum 38 mi hi positive hmuhchhuah tawh nena gym-a kalho thin a ni. Home quanrantine lai mek ve ve, symptom nei lo an ni. ITI Veng ah 2, mipa ve ve kum 25 leh 56 an ni a. A upa zawk hi Mizoram Police mi leh sa a ni. Hri an kaina chhui mek niin, home quanrantine lai mek ve ve an ni a, symptom nei lo an ni. Bethlehem Veng ah 1, mipa kum 32 mi, Manipur atanga lo kal a ni a. Quarantine Facility a khunghran lai mek, symptom nei lo a ni. BSF Composite Hospital, Durtlang ah 2, hmeichhia ve ve kum 6 & 37 an ni a, BSF sipai nupui leh fanu an ni. Manipur atanga lo kal, home quarantine lai mek niin, BSF Composite Hospital, Durtlangah an sample test a ni a, symptom an nei lo ve ve a ni. Zokhawsang ah 1, mipa kum 37, Assam Rifles sipai a ni a. Uttarakhand atanga lo kal, Zokhawsang quarantine centre-a khung hran lai mek, symptom nei lo a ni.

TrueNAT laboratory-a positive hmuh chhuah hi Chhingchhipah 1, mipa kum 20 mi a ni a. Assam atanga lo kal, Prem Kram Infracon Pvt Ltd. hnuaia thawk niin, an Company innghahna Chhingchhip-a quarantine a ni a, symptom a nei lo a ni. Rapid Antigen Test Positive hi Chanmari-ah hmeichhia 1, kum 57 mi, Trinity Hospital, Melthum-a hmuh chhuah a ni a, symptom nei a ni. Zarkawtah hmeichhia 1, kum 70 mi a ni a. Positive contact atanga hri kai niin, symptom a nei a ni. Serchhip district-ah BSF 3, 60 Bn BSF, Dawngzawl camp-a mi an ni. Bihar inthlanpuia an duty zawh hnua lo kir niin Quarantine facility-a khung hran lai mek, symptom nei lo an ni. Lawngtlai Council Vengah 4, mipa 2 (kum 23 & 38) leh hmeichhia 2 (kum 34 & 36) an ni a. Positive contact atanga hri kai vek niin, symptom nei 1 a awm.

District hrang hrang dinhmun chu Aizawlah vei mek 207, dam tawh 2359, thi 5, Lungleiah vei mek 27, dam tawh 289, Siaha ah vei mek 2, dam tawh 32, Champhaiah vei mek 23, dam tawh 63, Kolasibah vei mek 12, dam tawh 258, Serchhipah vei mek 63 dam tawh 95, Lawngtlaiah vei mek 88, dam tawh 147, Mamitah vei mek 5, dam tawh 74, Khawzawlah vei mek 5, dam tawh 16, Hnahthialah vei mek 1, dam tawh 14, Saitualah vei mek 1, dam tawh 20 an ni.