Aizawl: Mizoramah Covid-19 vei tihdam zat an pung zel a, nimin zing thleng khan a dam zat hi 97.93% an tling a ni.

January ni 15, 2021 a test neihah Mizoram ah COVID-19 positive thar 4 hmuhchhuah an ni. ZMC RT-PCR Laboratory-ah sample 378 (mipa 316 leh hmeichhia 62) test niin positive hmuhchhuah thar 3 an awm a. Mipa hlir niin, Ramthar North a cheng kum 31 mi, Karimganj atanga lo haw home quarantine lai leh, ZMC sak hna thawk mektu M/s. MP Khaitan Company hnuaia thawk kum 28 leh 47, covid-free certificate neih duh vanga sample test, lo positive ta si an ni a, symptom an nei lo ve ve a, hri an kaina chhui mek a ni.

District hrang hrang TrueNAT Laboratory-a sample 124 (mipa 101 leh hmeichhia 23) test zingah COVID-19 positive hmuhchhuah thar a awm lova. Rapid Antigen Test hmanga sample 384 (mipa 259 leh hmeichhia 125) test zingah COVID-19 positive hmuhchhuah thar 1 a awm thung a. Lawngtlai College veng mipa kum 20 mi niin symptom a nei lova, hri a kaina chhui mek a ni.

Tun dinhmunah Mizoramah Covid19 case 4314 a awm tawh a, heng zinga 3164 hi mipa niin 1150 chu hmeichhia an ni a, enkawlna hmun atangin 4225 damin an chhuak a, mi 9 an thi tawh a, tuna vei enkawl mek 80 an ni.