Aizawl: Tunlai hrileng (Covid-19) laka mipuite him zawk nan phai lam atanga zirlai leh hnathawk lo haw te khunghran an nih laia hnamdang sumdawng thenkhat zalen taka an kual vel chu thuneitu ten ngaimawhin hmalak an tum. Aizawl DC chuan Cr.PC 144 a puang bawk.

Mipui himna atan Aizawl DC Vanalalngaihsaka IAS? chuan tunlai khawvelin a buaipui mek Corona virus hrileng laka Aizawl district mipuite an lo him theih nan leh he natna hi a lo thleng anih palh hlauh pawha a darh zau loh nan danin thuneihna a pek angin Aizawl district huam chhungah Cr. PC?144 a puang a ni.

Aizawl DC?chuan vantlang hmunah reng reng mi 5 (panga) aia tam awmkhawm a khap a. He thupek hian Covid-19 hrileng do kawnga sawrkar hmalakna bawhzuitu te a huam lo ang. He thupek hi nimin March ni 21,2020 atanga April ni 10,2020 thleng a huam dawn a ni.

Tunlai hian state danga Mizo zirlai awm te leh hnathawka awm te chuan Mizoram an pankhawm mek a. Heng zirlai leh hnathawka lo haw te hi veng/khaw hrang hranga task force te chuan ni 14 chhung khung hran turin an ti a. Hetih lai hian hnamdang sumdawng vak vel te chu duh duha an vah kual theih bakah khung hran (quarantine) an nih loh avangin an ngaimawh thu Aizawl DC hova meeting nimin-a neih ah sawichhuah a niin hmalak rel a ni.

Mosolman thenkhat zinga Mosque kal thin te, zing kara hnamdang awm khawm te leh khawlaia tlangval awm khawm thin te chu tha lo an tih thu sawiin a reh theih nan khapna thupek hi puan niin thudawnna chuan a sawi bawk.