Aizawl: SP CID (Crime) Mizoram hnuaia Crime & Economic Offences Police Station thar chu Zirtawpni khan Devesh Chandra Srivastva, IPS, DGP, Mizoram chuan a hawng a.  Crime & Economic Offences Police Station hi SP CID (Crime), Mizoram Office building, Bungkawn, CID Complex, Aizawlah awmin a hnathawhna area hian Mizoram chhung a huam a ni.

Crime & Economic Offences Police Station thar hawnna hi MPSOA Conference Hall-ah hman niin Deotosh KS Singh IPS, SP CID (Crime) chuan hun hmasa lama CID (Crime), Mizoram-in economic offences a lo buaipui tawh dan leh tuna Police Station thar hawn a lo nih dan tlangpui a sawifiah a. Khuallian Devesh Chandra Srivasta chuan Criminal Investigation Department hna pawimawh tak tak Mizoram Police Manual 2005-a lo ziah tawh chu kum 17 hnuah a taka tihhlawhtlin a lo ni ta chu lawmawm a tih thu a sawi a. He Police Station dinna tura ni 10 October 2022-a notification chhuah atanga ni 23 lek chhunga hawn theih a ni chu lawmawm a tih thu a sawi. John Neihlaia IPS, IGP Hqrs.-in lawmthu sawina a hman zawhin hun tih tawp a ni.

Kum 2008 khan sawrkarin economic offences lam vila chhui turin ‘Wing’ a din a, tah chuan DIG CID chu Chairman niin, SP CID (Crime) chu Nodal Officer a ni a, SDPO/DySP 16 leh District tina Police Station 35-a OC-te chu Investigation Team an ni. Police Station hran siamsak an ni lo. Kum 2010 khan SP CID (Crime) hnuaia staff awmsa pawt thenin Economic Offences Wing (EOW) branch din a ni a, sum leh pai inbumna chhui te, FIU-IND Suspicious Transaction Report (STR) chhui te, Mizoram Protection of Interests of Depositors Act 2002/2019 hnuaia case mipui pawisa tihchingpenna chhui te, Non-Banking Financial Companies leh Unincorporated Bodies (UIBs) vil hna te thawkin sum tam tak tihchingpenna case engemaw zat an chhui tawh a ni.