ZALEN July 28, 2025 : ZPM Legislature Party-in kawngpui pawimawh avanga harsatna a taka vil tura a din Crisis Management Committee-in a rel angin Vawiin khan Minister C Lalsawivunga leh Adviser to Chief Minister Er. Ginzalal te chuan Sairang to Kawnpui kawng chhe lai an tlawh a, NHIDCL leh PWD hotu a hmuna awmte nen chak zawka hmalak dan tur an sawiho.

Minister Sawivunga leh a team te chuan Kawnpui leh Sairang inkar kawng chhe lai chu zawhin, an thawh chin te enfiah zel a ni a, hnathawktute chu chak taka hna thawk tur leh a chhe zual lai ngaipawimawh a siamtha vat vat turin an hriattir a ni.

July ni 26, 2025 (Inrinni) zan khan Kawnpui leh Sairang inkar kawngpui chhia leh chumi nghawng harsatna sut kian dan ngaihtuahin ZPM Legislature Party informal meeting hmanhmawh neih a ni a, a tuk Pathianni zing khan PWD hotu liante koh khawm an ni a, an hnathawh dan tura Mizoram sawrkar duh dante hrilhfiah an lo ni tawh a ni

ZPM Legislature Party hian he kawngpui pawimawh avanga harsatna a taka vil turin Crisis Management Committee an din nghal a, kawngpui siam hi nitin Minister leh MLA pahnih talin tlawh ziah turin an rel a, NHIDCL leh PWD-te hnathawh hi a hmunah endikin an vil thin ang.