Jammu & Kashmir-a duty Central Reserve Police Force (CRPF) chuan kum khat chhung, March 1, 2021 leh March 16, 2022 inkar khan mi firfiak 175 thatin 183 an man bawk.

Director General Kuldiep Singh chuan CRPF hian Left Wing Extremism (LWE) awmna state hrang hranga beihpui an thlaknaah Maoist hel pawl mi 19 thatin mi 699 an man bawk tih a sawi.

Inrinni hian CRPF hian MA Stadium, Jammu-ah 83rd Raising Day parade an nei dawn a. Delhi-NCR pawn lama an dincham pual parade an neih vawi khatna tur a ni.

Nilaini khan Singh hian Jammu & Kashmir boruak chu a tha a, hma lam panin a kal zel tih a sawi.

“Sorkar laipui hian force hrang hrangte hi ram chhung hmun hrang hrangah annual day parade nei turin a ti a, hei hi mipuite hnena chakna lantirna a ni a. Sipaite vek tihphurna a nih piah lamah mipui vantlanga, a bikin thalaite a tiphur a. Ram pum inpumkhatna turin a hlawk em em a ni,” a ti.

“CRPF hian category hrang hrang hnuaiah mi 117 a veng mek a. Tun hnaiah VIP Security Wing-ah hmeichhia mi 32 an lak luh thar an ni bawk,” tiin a sawi tih news agency ANI chuan a tar lang.

DG hian tun hnaia state pangaa assembly inthlanah VIP 41-te venhimna a pek thu a sawi a. Heng zinga mi 27-te chuan inthlan zawhah venhimna an pek an hnuh kir leh tawh thu a sawi.

Tun hnaia CRPF sipai, chawlh hmanga Kashmir Valley-a an ina a awm lai thah chungchang zawhna pawh Singh hian chhangin hetiang hi kumina a thlen vawi khatna a nih thu a sawi a. Chhui mek niin hun reilo te chhungin a titute man chhuah an nih tur thu a sawi.

Jammu & Kashmir-a venhimna dinhmun chungchang sawiin Singh chuan, “Duhthusam ang chu la ni lo mah se Article 370 hlih a nih hnuah khan lunga intawng ang kha a thleng tawh lo tluk a ni a, ram dang firfiak pawl lo lut ru leh beihna thleng pawh a tlahniam tawh hle a ni,” a ti.