Aizawl June 26, 2023 : Vawiin khan Chief Minister sawmna angin All Mizoram CSS Employee Coordination Committee Office Bearer-te chuan inkawm hona an nei a, July 27, 2023 atangin an nawrh tihtawp rih an tum. Vawiin veka Mizoram CSS Employee Coordination Committee meeting chuan July-a Cabinet meeting-in Chief minister-in a tiam an pawm sak lo a nih chuan an awm dan tur ngaihtuah that leh an rel.

Inkawmho naah hian sawrkara an thil phut, regularization/ absorption chungchang leh CSS ten medical reimbursement an neih ve theihna tura Recruitment Rules an siamsak tur chungchang te an sawiho a ni. Chief Minister hian regularization/absorption scheme siamsak bakah sawrkar hna nghet laka CSS te tana reservation siam te, CSS te tana Recruitment Rules siamte chu July thla chhunga Cabinet meeting-a ngaihtuah a, tih hlawhtlinsak ngei tura a tiam angin, Pen down/ toll down strike an neih mek chu July 27, 2023 atangin tihtawp lailawk nise an ti.

Vawiin June 26, 2023 dar 12.30 PM-a Chanmari YMA Hall-a All Mizoram CSS Employee Coordination Committee meeting chuan, July thla chhunga Mizoram chief minister-in a tiam Cabinet meeting-in min pawm sak lo a nih chuan an awm dan tur ngaihtuah that leh an rel. All Mizoram CSS Employee Coordination Committee hnuaia pawl zawng zawngten zawm vek turin an inhriattir bawk a ni.

All Mizoram CSS Employee Coordination Committee te chuan Mizoram sawrkarin an tana a siam Study Group on CSS report/ recommendation kum hnih dawn sawrkarin a up beh avanga sawrkar laka an lungawilohna an lantir avanga mipuite tawrhna pawi an ti a, Mizoram mipuiten an harsatna an hriatthiampuinaah lawmthu an sawi.