Nuai 115 a lachhuak tih police hmaah inpuang; ‘Axis bank hmunpui atangin cheque leaf (voucher) lo thleng se a chian kan ring’- Police

Aizawl: Axis bank, Aizawl Branch thawktu chuan an customer pakhat account atangin a hriatlohin sum thahnem tak a la nia puh a ni a, police hnenah a tam zawk chu ama lakchhuah a ni tih inpuang tawhin account neitu hian Police ah FIR thehlutin Police ten thil awmdan an chhui mek.
Zalen palai thudawn danin Account neitu hian January 23, 2020-a bank-ah a account a enfiah naah August, 2013 vel khan a account atangin tum hnih (2) pawisa tam tham tak lakchhuah a ni tih a hria a. Pawisa hi tum khatah Rs Nuai 75 leh a hnuah Nuai 115 tea lakchhuah a ni tiin Police ah hian complaint a thehlut a ni.
Hemi hma hian Rs Nuai 70 account atang hian lakchhuah a ni tawh bawk nia hriat a ni.
Thudawn danin account neitu hian a cheque bu chu Bank thawktute bulah hian signature pe sa vekin a dah a, hei hi Bank thawktu hian a dik lo zawng in an lo hmang ta nia rin a ni.
Police-te chuan he thil thleng hi an chhui nghal a, khatih laia manager operations leh bank hnathawk thu zawtfiah turin an la nia thudawn a ni.
Manager chawl tawh hian nuai 115 hi a lak niin a inpuang a, a hmaa draw Nuai 75 hi tu lak nge tih police lam chuan an chhui mek thu an sawi. Police hotute chuan Manager chawl tawh hian Nuai 115 hi a lak angin insawi mahse a ni chiah em tih danah a la chiang chuang lo a, court -ah pawha thu a a thlak leh thei niin Zalen an hrilh.
Tunah hian Axis Bank hmunpui (Mumbai) lamah pawisa lakchhuahna cheaque leaf (voucher) hi chah let niin a lo thlen hunah enfiah a ni ang a, forensic leh bank kalphung mila enin thil chhui chhuah theih an beisei niin police lam chuan an sawi.
Police chuan Axis Bank manager hlui hi Central jail ah dahin a hnuah bail a chhuah leh a ni.
Zalen palai chuan he thilthlengah hian Axis Bank thawktute chu thil awmdan zawhf iah a tum a, Manager pangngai hi a awm loh (duty) vangin tuna Mana-ger lailawk chuan engmah thil chiang a hriat ve loh thu a sawi.
Zalen chuan bank officer hnathawk dangte a kawmnaah bank hnathawk zingah customer te pawisa laksak chu a thlen zauh tawh thu leh man chhuah a nih loh chuan a mihringa zirin tinawn duh an awm an rin thu an sawi bawk.
Chanmari, Bawng kawn, Khatla, Champhai leh Lungleiah te Axis Bank hian Branch an nei mek a ni.