Aizawl: Child Welfare Committee (CWC) chuan kum kalta April, 2019 atanga March, 2020 inkar chhung khan case dawn thar 835 an nei a. CWC case zingah hian nu leh paten ruihhlo an tih vanga naupang an buai pui chu a tam ber a ni.
Child Welfare Committee hian April, 2019-March, 2020 inkar chhung hian case dawn thar 835 neiin kum hluia case chinfel loh 39 nen a vaiin 874 an nei a. Kum kalta chhung vek khan an case neih atang hian 813 chu chingfel (dispose)-in a dang 61 chu kumthar lama ngaihtuah turin an dah a ni.
CWC case buaipui zingah hian nu leh paten ruih-theih thil an buaipui avanga fa an enkawl theih loh case chu a tam ber a ni a, hetiang case hi 122 awmin hei hi case an neih zawng zawng 835 atanga chhutin 14.61% a ni a. Hei bakah hian mipat hmeichhiatnaa khawih (PoCSO Act)-te chu an buaipui langsar zual an ni.

Kum kaltaa CWC in an buaipui case 835 zinga 424 (50.78%) hi mipa niin hmeichhia 411 (49.22%) an awm a. CWC a case lut zinga 250 (29.94%) chu kum 5 hnuailam an ni a, kum 6-10 inkar 221 (26.47%), kum 11-14 inkar 242 (28.98%) leh kum 15-18 inkar 122 (14.62%) an awm a ni. Nikum chhunga case lut te hi Mamit district atangin 53, Kolasib 120, Aizawl 380, Champhai 49, Serchhip 35, Lunglei 80, Lawngtlai 74 leh Siaha district atangin 44 te an ni. Child Welfare Committee in kum kalta chhunga case an chinfel 813 zingah hian Childrens home a naupang dah chu a tam ber a niin home ah hian 264 dah a ni a, hei hi case an chinfel atanga chhutin 32.47% a ni a. Case chinfel tam zual zingah counselling tura hruai te, vaukhan (warning/reconciliation) te a tel a ni.