ZALEN March 26, 2025; Aizawl District Child Welfare Committee (CWC) in Aizawl veng pakhata thil thleng (naupang insual) video theh darhtute chu delete vek turin an ngen.

Thuchhuah an siama an tarlan danin, tunhnaia Aizawl veng pakhata thil thleng (naupang insual) video a darh nasa hle tih hriat a ni a. Hei hi Aizawl District Child Welfare Committee (CWC) chuan thalo a ti hle.

He thil thleng hi hriat a nih veleh dan anga hmalak nghal a ni a. Hmalak mekna a nih avângin video hi tumahin lo thehdarh tawh lo turin leh social media lama lo post tawh tu te pawhin lo delete leh vek turin an hriattîr.

Naupang kum tlinglo te hi danin a humhalh tlat avangin an chungchang social media lama sawi leh thehdarh chungchangah mipui te fimkhur a tul hle a. Naupang hmel leh nihna tarlang chunga hetiang thil thehdarh hi dan bawhchhiatna a ni a. Hetiang thil thleng dang a awm leh a nih pawhin social media a thehdarh mai lova, CWC hnena hriattir thuai thin zawk turin mipui te an ngenin an hriattir bawk.