ZALEN April 27, 2025 : Mizoram Police te chuan kum 2021 atanga April 22, 2025 thleng khan cyber crime kaihhnawiah mi 113 manin mi 40 chu thiam loh chantir (convict) an ni tawh.

ZALEN thudawn danin kum 2021 khan cyber crime police-te chuan mi 18 manin mi pakua convict a ni a, kum 2022-ah mi 26 manin 17 tantir an ni a, kum 2023-ah mi 32 manin 12 tantir an ni a. Nikum khan mi 30 manin pahnih tantir an ni a, kumin kum tir atanga April 22, 2025 thleng khan mi pasarih man tawhin convict erawh an la awm lo thung.

Nikum April 1 leh March 31, 2024 chhung bik khan cyber crime police station chuan case 17 ziak lutin mi panga tantir an ni a, hemi hun chhung vek hian National Crime Reporting Portal kaltlangin case 637 ziah luh a ni bawk.

Cyber crime police chuan inbumna thubuaiah hian nikum (sawrkar kum) chhung khan inbumna thubuaia sum an hmuh letsak chu Rs. 99,48,196 a tling a, Rs. 1,107,745.37 chu NCRP-ah hren hrih a ni bawk.

Cyber crime thawktute chuan sum leh pai inbumna zingah army scam chu tam berin mi sualte hian sipai lemah changin tlawm deuh deuhin thil an zuar a, hrechiang loten pawisa pein sum thahnem tak an hloh thin niin an sawi a. Hei bakah hian thil thawn tlan (khul) ngai a awm nia sawiin mi tam tak sum an laksak thin niin cyber crime thawktute chuan an sawi bawk.

Heng mi sualte hian an pawisate hi account hrang hrangah an thawn darh ngah zel a, hei bakah ATM hmanga an lak chhuah zung zung thin vangin hmuh let bakah chhuichhuah an har a; chuvangin, mipuite fimkhur a ngai hle niin an sawi.

Zawhna chhangin hetiang mi bum ching hi a tlangpuiin Bihar, Uttar Pradesh leh Jharkhand vela mi sual an ni deuh ber niin an sawi bawk.

Sum kaihhnawih inbumna zingah mipat hmeichhiatna rawngkai (sextortion) hmanga mi vau chu a hluar hle niin an sawi bawk a. Mi sualte hian video call hmanga biain an mi biakte chu inphelruak turin an ti a, chu chu lo record-in a hnuah pawisa an pek loh chuan an sex video chu tihdarhah an vau leh thin niin an sawi bawk.

Cyber crime thawktute chuan internet hmanga inbumna kaihhnawihah hian chawhrualin ni tin FIR 20 vel dawng ang an nih thu an sawi a. Report lut lo eng emaw zat a awm niin an sawi bawk.

ZALEN zawhna chhangin police hotute chuan, “Fimkhur tura mipui nasa taka kan ngen chungin kan case tam ber hi sum leh pai inbumna case a ni a. Chawhrualin ni tin FIR 20 atanga 30 inkar dawng thin ang kan ni a, hetih rual hian state pawn lam thil (inter state case) a tam avangin chhui a har thei hle a ni,” an ti.

Mi sualten mi an bum dan tlangpui sawiin, “Facebook-ah thian atan sawmin an biak nel hnuah an thil thawn khulna tur pawisate an dil a, mi tam tak chuan a tak tak emaw tiin sum an thawn a; mahse, hmuh let a har tawh thin a. Hei bakah mi thenkhat an bank account no hrilhte awmin an sum an lo lak chhuaksak a. Sumdawnna thilah thawhpui tur anga insawia sum lo pe te, saruak thlalak thawna chumi hmanga vau let a sum dilte chu a langsar zualte an ni,” tih an sawi bawk.