Zirchianna (survey) atanga alan danin, India Cycles4Change Challenge intihsiakna hnuaia khawpui inziak lut 107 zinga tel mek Aizawlah mipuiten him takin cycle an khalh thei dawn niin a lang a. Hetihlai hian Aizawl-a survey zawhna chhangtu mipa zaa 99 leh hmeichhia zaa 70-te chu cycle khalh thiam an ni.

October 2020 thleng a India Cycles4Change Challenge intihsiakna hnuaia stage I ah, khawpui hrang hrangte chuan ruahmanna (design) siamin a tih dan tur an duang chhin a, chung atanga ti tha khawpui 11 te chu stage II a thlan tur niin, he hmalakna tihhlawhtlin nan cheng vbc. 1 pek an ni anga, mithiam bik (expert) kaihhruaina hnuaiah hma lak chhunzawm tur a ni ang. Stage II hian May 2021 thleng a awh dawn a ni.

India Cycles4 Change Challenge intihsiakna hi June 25, 2020 khan Union minister Hardeep Singh Puri chuan 5th Anniversary Celebrations of Smart City Mission inkhawmnaah alo tlangzarh tawh a. He intihsiakna hian khawpuite cho phurin, mipuite-ah cycling uar sauh sauh tur leh Covid 19 hnu lam atana mipuiten him taka cycle an khalh theih dan tur ruahmanna siam chhuak turin a phut a ni.

Aizawl Smart City chuan he intihsiakna hnuaiah hian khawpui chhung hmun hrang hrang atangin kar riat chhung zirchianna a nei tawh a. Chung zirchianna ah chuan cycle khalhtuten harsatna an tawhte leh an ngaihdan hrang hrang lakkhawm niin, Aizawlah chuan mipa 229 leh hmeichhia 120 ten he zawhna hi an chhang.

Survey atanga a lan danin Aizawlah he hmalakna hi tha taka kalpui theih a ni dawnin a lang a. He hmalaknaah hian Thuampui-Zampuimanga Thlan (main road) km 14 leh Vaivakawn-Mizoram University via Zonuam road km 13 te chu cycle khalhna tura ruahmanna hmasa ah neih a ni.

Heng kawng pahnihahte hian eng harsatna nge an tawh tih zirchian hmasak a ni dawn a, thurawn leh ngaihdan sawi duh nei tan cycles4changeaizawl@gmail.com-ah engtik lai pawhin thawn theih reng a ni.

Mipuite puihna in tun dinhmunah Aizawl khawpui chu IndiaCycles4change Challenge intihsiaknaa a che tha ber te zinga mi a ni mek a. Hmasawn zel tur chuan a taka cycle khalh theih dan tur zawn leh khalh uar sauh sauh a pawimawh dawn a ni. Aizawl khawpui tawt takah hian oil hmang lo, boruak chhia siam lo, hriselna ni bawk cycle hi intihhmuh ila, khawpui tawt a lo ziaawm ang a, khawpui nuam tak a lo ni dawn a ni.