Aizawl June 3, 2024 : Vawiin hian Mizo Hnam Run-ah chhung inkhawm neih a ni a, he hunah hian PAC member R Lalzirliana, Ex Minister chuan thu a sawi a. "Cyclone Thli pui leh ruah pui nasa tak lo thleng tur warning nasa tak kan dawng lawk vek a. DC-in a hminga thuchhuah an siam bak sawrkar a inbuatsaih miah lo a. A pawi hle a ni. Sawrkar inbuatsaih tha se, heti lutuk lo deuh hian kan tuar lo'ng maw? tih a ngaihtuah theih a ni," a ti.

Zira chuan, "Lei a min nasa tih chu kan hre vek a, chuti chungin Hospital lian leh pawimawh em em ZMC kawng a ping rei lutuk kha a pawi hle. Dam lo tam tak awm mekna hmun, Aizawl atanga damdawi leh tul dang lakluh reng a tulna hmun khati taka an clear muang kha a zahthlak. Kha aia rang khan a clear theih tih a chiang a ni. Sawrkar rintlak leh mipui ngaihsak tak tak kan nei lo tih a chiang hle a ni," a ti bawk.

R Lalzirliana chuan, "Campaign laiin sawrkar sum puk nasa takin an sawisel a. 'Kan puk ve lovang' an tia. An han sawrkar ta a, thla tin vaibelchhe tel an puk a, pawisa puk chawpin an nung tawk tawk a nih hi. Central atanga sum sawichhuah pakhatmah an neih kan la hre lo a, thla nga chhung hian an nawi hle a ni," a ti.

Home Minister hlui chuan, "Thla khat chhungin dan loa bungraw tawlh kan ti tawp ang, an tia. Insawi theih nana hetiangte hman chi a ni lo. Kuhva tawlh pawh tun thlengin mipuiin tlaivara duty-in an la buaipui mek a nih hi," a ti a. "Police 1047 laiin vote an thlak thei lote kha a pawi hle. Kum 10 Home Minister ka nih chhung khan hetiang hi vawi khatmah a thleng lo. Central lamin an rawn demand apiang kan tingawt ngai lo. Chief Minister IPS, Central hlau em em kan nei a. Ramri hung chungchangah pawh kan duh lo em em a. CM berin, 'kan thuneihna piah lam a ni, kan hnial thei lovang' a ti. Vaiho thu thua awm tum CM kan nei hi a thlamuan thlak loh hle," a ti bawk.